Ayodhaya Ram Mandir : राममंदिराचे काम चाळीस टक्के पूर्ण

अयोध्या : अयोध्येतील राम मंदिराचे गेल्या दोन वर्षांत चाळीस टक्के काम पूर्ण झाले असल्याचे श्रीरामजन्मभूमी ट्रस्टचे सरचिटणीस चंपत राय यांनी आज ‘पीटीआय’शी बोलताना सांगितले. तसेच, डिसेंबर २०२३ पासून जगभरातील भाविक प्रभू श्रीरामाचे दर्शन घ्यायला येतील, असा विश्‍वासही त्यांनी यावेळी व्यक्त केला. पंतप्रधान नरेंद्र मोदी यांच्या हस्ते दोन वर्षांपूर्वी राममंदिराचे भूमिपूजन झाले होते. त्यानंतर ४० टक्के बांधकाम पूर्ण झाले आहे, असे चंपत राय यांनी सांगितले. बांधकाम अत्यंत वेगाने सुरु असून रस्तेही अधिक रुंद केले जात आहेत.

चंपत राय हे अयोध्येतच राहून कामावर देखरेख ठेवत आहेत. विश्‍वस्त मंडळाच्या सभासदांनी दिलेल्या माहितीनुसार, हे मंदित हजारो वर्षे टिकावे यासाठी प्रचंड मोठा पाया बांधण्यात आला आहे. मंदिरासाठी निधी कोठून येतो, असे विचारले असता राय यांनी,‘देवाच्या कार्यासाठी पैशांची कमतरता नाही. लक्ष्मी देवाच्या चरणांपाशीच बसलेली आहे,’ असे उत्तर दिले.

सर्वसाधारण रचना

• आठ एकर परिसरात बांधकाम

• पूर्व दिशेला प्रवेशद्वार

• सीता, गणपती, वाल्मिकी, केवट, शबरी, जटायू आणि शेषावतार लक्ष्मण यांचीही मंदिरे परिसरात बांधणार

• राजस्थानातील मकराना येथून संगमरवराचा गर्भगृह बांधण्यासाठी वापर

• संगमरवर योग्य आकारात कापण्याचे काम रात्रंदिवस सुरु

• राममंदिर ते हनुमानगढी हा मार्ग विस्तीर्ण करणार, यासाठी अनेक दुकाने आणि घरांचे पाडकाम