तुम्ही सर्व आजार कसे बरे करू शकता? सुप्रीम कोर्टाकडून बाबा रामदेव यांना नोटीस

Baba Ramdev News : बाबा रामदेव इतर वैद्यकीय यंत्रणेचा गैरवापर कसा करू शकतात? असा सवाल सुप्रीम कोर्टानं उपस्थित केलाय. न्यायालयाला हे जाणून घ्यायचं आहे की, बाबा रामदेव सर्व रोग बरा करू शकतात याची कशी हमी देतात? असंही कोर्टानं म्हटलंय.

इंडियन मेडिकल असोसिएशननं (Indian Medical Association IMA) बाबा रामदेव यांनी अॅलोपॅथीच्या (Allopathy Medicine) विरोधात दिलेल्या जाहिरातीवर याचिका दाखल केली असून त्यावर आज न्यायालयानं भाष्य केलं.

सुप्रीम कोर्टानं बाबा रामदेव यांना नोटीस बजावली असून चार आठवड्यात उत्तर मागितलंय. बाबा रामदेव यांनी अॅलोपॅथिक औषधं आणि लसीकरणाविरोधात केलेल्या वक्तव्यावर सर्वोच्च न्यायालयानं नाराजी व्यक्त केलीय.

सरन्यायाधीशांनी म्हटलंय की, बाबा रामदेव यांना काय झालं? योग लोकप्रिय केल्याबद्दल आम्ही त्यांचा आदर करतोच. परंतु, त्यांनी उपचारांच्या इतर पद्धतींवर शंका घेऊ नये. त्यांनी इतरांवर टीका करणं टाळावं, असं त्यांनी स्पष्ट केलंय.