धक्कादायक! दुसऱ्या तरुणाकडून लिफ्ट घेतली म्हणून पत्नीला झाडाला बांधून मारहाण

जयपूर : राजस्थानच्या बांसवाडा जिल्ह्यात (Banswara District) माणुसकीला लाजवेल अशी घटना समोर आलीय. एका महिलनं वाटेत मित्राकडून गाडीवर लिफ्ट घेतली. हे महिलेच्या नवऱ्याला समजल्यावर त्याचा माथा फिरला यानंतर नवऱ्यानं महिलेला झाडाला बांधून बेदम मारहाण केली. या घटनेचा व्हिडिओ व्हायरल होताच पोलिसांनी पीडितेचा शोध घेतला आणि या प्रकरणाची दखल घेत 6 जणांवर गुन्हा दाखल करण्यात आला असून त्यापैकी 2 अल्पवयीन आहेत.

आरोपी नराधम पतीनं आपल्या पत्नीला झाडाला बांधून जबर मारहाण केलीय. इतकी क्रूर शिक्षा करण्याचे कारण ऐकून तुम्हालासुद्धा धक्का बसेल. यामध्ये पीडित महिलेनं एका पुरुष मित्राकडून लिफ्ट घेतल्यामुळं नाराज झालेल्या पतीनं आपल्या पत्नीला असं झाडाला बांधून मारलं. या घटनेचा व्हिडिओ सध्या सोशल मीडियावर जोरदार व्हायरल होत आहे.

ही घटना बांसवाडाच्या घाटोल सर्कल या ठिकाणी घडलीय. व्हायरल होणाऱ्या व्हिडिओमध्ये एक तरुण तरुणीला झाडाला बांधून मारहाण करत असल्याचं स्प्ष्टपणे दिसत आहे. हा व्हिडिओ मोठ्या प्रमाणात व्हायरल झाल्यानंतर पोलिस अधीक्षकांनी या घटनेच्या चौकशीचे आदेश दिले. रात्री सुमारे दोनच्या सुमारास या पती-पत्नीला शोधून काढण्यात आलं. यानंतर पीडित महिलेनं रात्री एफआयआर दाखल केली. यानंतर आरोपी पती, महावीर, दीर कमलेश, भावजय सुंका आणि मामे सासऱ्यांनी या दोघांना दांडक्यांनी आणि बुटांनी मारहाण केली. या मारहाणीचा व्हिडिओ सोशल मीडियावर मोठ्या प्रमाणात व्हायरल झाला आहे.