धक्कादायक! स्कूल बसमध्ये 3 वर्षाच्या चिमुरडीवर बलात्कार; चालकासह महिला मदतनीसला अटक

भोपाळ : भोपाळमधील (Bhopal) रातीबाद पोलीस स्टेशन हद्दीत (Ratibad Police Station) असलेल्या एका नामांकित खासगी शाळेतील (Private School) नर्सरीच्या विद्यार्थिनीसोबत स्कूल बसमध्ये (School Bus) बलात्कार झाल्यानं खळबळ उडालीय.

मुलीच्या कुटुंबीयांच्या तक्रारीनंतर चालक आणि महिला मदतनीस दोघांनाही अटक करण्यात आलीय. रातीबाद पोलीस ठाण्यात आरोपी चालक आणि एका महिलेविरुद्ध बलात्कार आणि पोक्सो कायद्यान्वये (POCSO Act) गुन्हा दाखल करण्यात आलाय.

काय आहे संपूर्ण प्रकरण

पीडित मुलीचं वय अवघे 3 वर्षे 6 महिने आहे. 8 सप्टेंबरला चिमुरडी शाळेतून घरी परतली, तेव्हा तिचा शाळेचा ड्रेस बदलण्यात आला होता. मुलीच्या आईनं तिला शाळेचा ड्रेस बदलण्याचं कारण विचारलं. तेव्हा तिनं सांगितलं, 'ड्रायव्हर काका मला वेगवेगळ्या ठिकाणी स्पर्श करतात आणि त्यांनी माझा ड्रेस बदललाय.' यानंतर कुटुंबीयांनी दुसऱ्या दिवशी शाळा व्यवस्थापनाची भेट घेऊन तक्रार दाखल केली आणि सीसीटीव्ही फुटेज दाखवण्याची मागणी केली. शाळा व्यवस्थापनानं फुटेज दाखवण्यासाठी दोन दिवसांची मुदत मागितलीय.

यासोबतच शाळा व्यवस्थापनानं बसमधील महिला मदतनीसला बोलावून चौकशी केली असता, तिनं बसमध्ये मुलगी पाणी पीत असल्याचं सांगितलं. मुलीच्या टी-शर्टवर पाणी पडलं होतं, त्यामुळं मुलीचा टी-शर्ट बदलावा लागला. शाळा व्यवस्थापनाच्या या गोष्टीवर कुटुंबीयांचा विश्वास बसत नव्हता. सोमवारी कुटुंबीयांनी आरोपींविरुध्द पोलिस ठाण्यात गुन्हा दाखल केलाय.