Gautam Adani-Hindenburg Research : अदानींना तिसरा धक्का! महत्त्वपूर्ण डील हातातून निसटली

नवी दिल्ली : अडचणीत सापडलेल्या अदानी समूहाचे अध्यक्ष गौतम अदानी यांना आणखी एक मोठा झटका बसला आहे. सीके बिर्ला समूहाची कंपनी ओरिएंट सिमेंटने अदानी पॉवर महाराष्ट्रसोबतचा करार रद्द केला आहे.

ओरिएंट सिमेंट यांच्यानुसार, अदानी समूह या करारासाठी आवश्यक मंजुरी मिळवण्यात अपयशी ठरला. ओरिएंट सिमेंटने सप्टेंबर २०२१ मध्ये अदानी समूहासोबत सामंजस्य कराराची घोषणा केली होती.

कंपनीने शेअर बाजाराला सांगितले की, अदानी पॉवरने हा करार न करण्याची विनंती केली आहे. 24 जानेवारी रोजी हिंडेनबर्ग संशोधन अहवाल समोर आल्यानंतर अदानी समूहाला हा तिसरा मोठा धक्का आहे. पहिल्यांदा, त्यांना DB पॉवर खरेदी करण्याचा करार पूर्ण करता आला नव्हता. त्यानंतर PTC India साठी बोली लावण्यापासून अदानी समूहाने माघार घेतली होती.

दोन्ही कंपन्यांनी महाराष्ट्रातील तिरोडा येथे सिमेंट ग्राइंडिंग युनिट स्थापन करण्यासाठी सप्टेंबर 2021 मध्ये सामंजस्य करार केला होता. त्यासाठी ओरिएंट सिमेंटने 35 एकर जमीनही पाहिली होती. परंतु ओरिएंट सिमेंटचे म्हणणे आहे की अदानी पॉवरला त्यांच्या प्लांटसाठी एमआयडीसीकडून आवश्यक मंजुरी मिळू शकली नाही.

तसेच या सामंजस्य कराराची कालमर्यादाही निघून गेली आहे. बुधवारी अदानी पॉवरचा समभाग पाच टक्क्यांनी घसरून १६२.४५ रुपयांवर बंद झाला, तर ओरिएंट सिमेंटचा समभाग दोन टक्क्यांनी घसरून ११७.३५ रुपयांवर बंद झाला.