महागठबंधन सरकार विधानसभेत आज बहुमत सिद्ध करणार; तेजस्वी यादवांनी जारी केला 'व्हीप'

Bihar Politics : बिहारसाठी राजकीयदृष्ट्या आजचा दिवस खूप महत्वाचा मानला जात आहे. आज 24 ऑगस्टपासून विधानसभेचं दोन दिवसीय विशेष अधिवेशन सुरू होत आहे. यादरम्यान मुख्यमंत्री नितीश कुमार (CM Nitish Kumar) यांच्या नेतृत्वाखालील महागठबंधन सरकार (Mahagathbandhan Government) सभागृहात विश्वासदर्शक ठराव मांडणार आहे. तर, दुसरीकडं विधानसभा अध्यक्षांवरून सतत रस्सीखेच सुरू आहे.

सभापती विजय सिन्हा (Vijay Sinha) आपलं पद सोडतात की नाही याकडं सर्वांचं लक्ष लागलंय. पदावरून दूर न झाल्यास सत्ताधारी पक्ष त्यांच्याविरोधात अविश्वास प्रस्ताव आणू शकतो. या सगळ्या दरम्यान उपमुख्यमंत्री आणि आरजेडी विधीमंडळ पक्षाचे नेते तेजस्वी यादव (Tejashwi Yadav) यांनी राष्ट्रीय जनता दलाच्या (RJD) सर्व आमदारांसाठी व्हीप जारी केलाय. सर्व आमदारांना सभागृहाचं कामकाज सुरू झाल्यापासून ते शेवटपर्यंत उपस्थित राहण्याचे निर्देश देण्यात आलेत.

बिहार विधानसभेचं एकूण संख्याबळ 243 आमदार असलं, तरी सध्या केवळ 241 सदस्य आहेत. विधानसभेच्या 2 जागा रिक्त आहेत. दरम्यान, असदुद्दीन ओवैसी (Asaduddin Owaisi) यांच्या AIMIM च्या एकमेव आमदारानं विश्वासदर्शक ठरावादरम्यान महागठबंधन सरकारच्या बाजूनं मतदान केल्याचं सांगितलंय. अशाप्रकारे सभागृहात एकूण 165 आमदार महागठबंधनच्या बाजूनं असतील. यापूर्वी महागठबंधनात सहभागी सर्व पक्षांच्या आमदारांसह एक अपक्ष असे 164 आमदार होते. अपक्ष सुमितकुमार सिंह यांनी सरकारला पाठिंबा देण्याची घोषणा केली होती. बिहार विधानसभेतील आमदारांची सध्याची संख्या पाहता सध्या बहुमतासाठी 121 आमदारांची गरज आहे.