बिहार, झारखंडमध्ये पुरस्थिती गंभीर; शेकडो गावांना पाण्याचा वेढा | Sakal
sakal

बोलून बातमी शोधा

bihar

बिहार, झारखंडमध्ये पुरस्थिती गंभीर; शेकडो गावांना पाण्याचा वेढा

पाटणा : बिहार आणि झारखंडमध्ये पुराची स्थिती गंभीर होत आहे. गंगा नदीने रौद्र रूप धारण केल्याने भागलपूर येथे महापुराने थैमान घातले आहे. ५०० पेक्षा अधिक गावांना पाण्याचा वेढा पडला असून तीनशेहून अधिक शाळा पाण्याखाली गेल्या आहेत. राष्ट्रीय महामार्ग ८० वर अनेक ठिकाणी पाणी आल्याने वाहतूक अद्याप विस्कळित आहे. आज राष्ट्रीय महामार्ग-३१ वर वाहतूक बंद करण्यात आली.

नवगछियाच्या रंगरा विभागात भवानीपूरजवळ एनएच-३१ खालून पाणी वाहत असल्याने वाहतूक थांबवण्यात आली आहे. आज सकाळी राष्ट्रीय महामार्ग ३१ वर पुन्हा पाणी आले आणि ही ठिकाणी रस्त्याच्या खालचा भाग खचला. त्यामुळे वाहतूक थांबवण्यात आली. राष्ट्रीय महामार्ग ३१ हा उत्तर, बिहार राज्यातून बंगालकडे जातो.

हेही वाचा: माजी पंतप्रधान राजीव गांधींची जयंती; PM मोदींनी केलं ट्विट

हा मार्ग बंद केल्याने भागलपूरचा पूर्णिया, कटिहार आदी शहराशी असलेला थेट संपर्क तुटला आहे. रस्त्याच्या दोन्ही बाजूंनी वाहनांच्या रांगा लागल्या आहेत. त्यामुळे अधिकाऱ्यांनी घटनास्थळी धाव घेऊन पर्यायी वाहतुकीची व्यवस्था करत आहेत.

राष्ट्रीय महामार्ग ८० बंद :

पाटण्याहून भागलपूरमार्गे झारखंडच्या साहिबगंजकडे जाणारा राष्ट्रीय महामार्ग-८० वरील वाहतूक आठवड्याभरापासून बंदच आहे. सुलतानगंजपासून कहलगाव यादरम्यान एक डझनभर ठिकाणी एनएन-८० मार्गावर पाणी आले आहे.

भागलपूरहून पूर्व आणि पश्‍चिमेकडे जाण्यासाठी आज सहाव्या दिवशीही रेल्वे वाहतूक बंद होती. भागलपूर येथे स्थिती चिंताजनक असून नऊ लाखांपेक्षा अधिक नागरिकांना पुराचा फटका बसला आहे. राज्यातील शंभरपेक्षा अधिक राज्य महामार्गावरून पाणी वाहत असल्याने वाहतूक ठप्प पडली आहे. नागरिकांना सुरक्षित ठिकाणी नेण्यात येत आहे.

हेही वाचा: रवींद्रनाथ टागोर यांचा रंग सावळा; केंद्रीय मंत्र्याचे वादग्रस्त विधान

भागलपूरचा ग्रामीण भागही पाण्याखाली :

भागलपूरमध्ये शहराबरोबरच ग्रामीण भागात पाणीपातळी वाढू लागली आहे. त्यामुळे जनजीवन विस्कळित झाले आहे. पूरग्रस्त भागातील नागरिक घर सोडून सुरक्षित ठिकाणी जाण्यासाठी धडपड करत आहेत. शहरातील ५१ पैकी आठ वॉर्डात पाणी आले आहे. पानगर, बाइस बिग्घी, लालूचक, साहेबगंज, किलाघाट, खंजरपूर येथे पाण्याचा प्रवाह असल्याने अनेक घर पाण्याखाली गेले. वॉर्ड २५ मधील गल्ली आणि रस्ते पाण्यात गेले आहेत.

Web Title: Bihar Jharkhand The Situation Is Dire Hundreds Of Villages Surrounded By Water

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
टॅग्स :JharkhandBiharrain