नितीशकुमारांनी 'ही' अट मान्य केल्यास, त्यांना पाठिंबा देणार; प्रशांत किशोर यांचं मोठं विधान

पाटणा : बिहारमध्ये नितीशकुमार (Nitish Kumar) यांनी भाजपची (BJP) साथ सोडत ​​आरजेडीसोबत (RJD) सरकार स्थापन केलं. पण, राज्यातील राजकीय घडामोडी तिथंच थांबलेल्या नाहीत. आता निवडणूक रणनितीकार प्रशांत किशोर (Prashant Kishor) पुन्हा नितीशसोबत येणार असल्याची चर्चा सुरू झालीय. त्यांनी दोन दिवसांपूर्वी नितीशकुमार यांची भेट देखील घेतली आहे.

मात्र, या भेटीवर निवडणूक रणनितीकार प्रशांत किशोर यांनी स्पष्टीकरणही दिलंय. ते म्हणाले, दोन दिवसांपूर्वी नितीश कुमार यांची भेट घेतली आणि अनेक मुद्द्यांवर चर्चा झाली. ही बैठक केवळ सामाजिक, राजकीय आणि सौजन्यपूर्ण भेट होती. या दरम्यान आम्ही कोणत्याही निष्कर्षापर्यंत पोहोचलो नाही, असं त्यांनी सांगितलं.

मी माझ्या अभियानातून मागं हटणार नाही. माझी जनसुराज्य यात्रा सुरूच राहणार असून मी राज्यातील सर्व लोकांना भेटून त्यांना बिहारच्या भविष्याबाबत समजावून सांगणार आहे, असंही त्यांनी स्पष्ट केलं. एका वर्षात 10 लाख बेरोजगार तरुणांना नोकऱ्या दिल्यास एका अटीवर नितीश कुमार यांच्यासोबत युती करणार असल्याचंही प्रशांत किशोर यांनी सांगितलं.