Giriraj Singh : ''लव्ह जिहादच्या रूपात सनातन धर्म संपवण्याचा डाव''

नवी दिल्ली : केंद्रीय मंत्री गिरिराज सिंह यांनी लव्ह जिहादला दहशतवादाचे नवे रूप म्हटले आहे. लव्ह जिहादच्या रूपात दहशतवादाच्या माध्यमातून भारतातील सनातन धर्म नष्ट करण्याचे सुनियोजित कारस्थान रचले जात असल्याचेही त्यांनी सांगितले.

दिल्लीतील श्रद्धा हत्याकांडानंतर आसामचे मुख्यमंत्री हिमंता बिस्वा सरमा व अनेक भाजप नेते उघडपणे लव्ह जिहाद व प्रस्तावित लोकसंख्या नियंत्रण कायदा याबाबत उघडपणे बोलत आहेत. संसदेने लोकसंख्या नियंत्रण कायदा लवकरात लवकर करण्याची गरज असून तसे झाल्यास देशाचा सर्वांगीण विकास होईल, असेही प्रतिपादन सिंग यांनी केले.

लव्ह जिहादच्या रूपाने दहशतवादाच्या माध्यमातून भारतातील सनातन धर्म नष्ट करण्याचे भयंकर षडयंत्र रचले जात आहे ते सनातन धर्म मानणाऱ्यांनी संघटित होऊन हाणून पाडावे असेही ते म्हणाले.

दिवंगत आमदार कृष्णानंद राय यांच्या पुण्यतिथीनिमित्त उत्तर प्रदेशातील मोहम्मदाबाद येथे आयोजित श्रद्धांजली सभेला बोलताना ते म्हणाले की चीनमध्ये दर मिनिटाला 10 मुले जन्माला येतात, तिथे भारतात दर मिनिटाला 31 मुले जन्माला येत आहेत. त्यामुळे विकास वेगाने होत नाही.विकासाला खीळ बसते.

योगी आदित्यनाथ सरकारचे कौतुक करताना ते म्हणाले की, राज्यात गुंडाराज चा वेगाने खात्मा केला जात असून गुन्हेगारांचे उर्वरित आयुष्यही आता तुरुंगातच व्यतीत होणार आहे.