Congress: या मतदारसंघात काँग्रेस करतंय चक्क 'नोटा'चा प्रचार, काय आहे कारण?

भोपाळ- इंदौर लोकसभा मतदारसंघाच्या ( Indore lok sabha 2024) शर्यतीतून काँग्रेस बाहेर पडली असली तरी पक्षाकडून एक वेगळी रणनीती अवलंबली जात आहे. काँग्रेसचे इंदौर लोकसभेचे उमेदवार अक्षय कांती बाम यांनी अखेरच्या क्षणी माघार घेतली आणि ते भारतीय जनता पक्षामध्ये सहभागी झाले. त्यामुळे भाजपसाठी ही लढाई सोपी झाली आहे. पण, काँग्रेस सहजासहजी शस्त्र खाली ठेवण्यास तयार नाही.

इंदौरच्या लोकांनी 'नोटा' म्हणजेच यापैकी कोणीही नाही याला मत द्यावे यासाठी काँग्रेसकडून तयारी सुरु आहे. इंदौर लोकसभा मतदारसंघामध्ये चौथ्या टप्प्यात १३ मे रोजी मतदान होणार आहे. त्यासाठी काँग्रेसने एकप्रकारे 'नोटा'साठी प्रचार सुरु केला आहे. ठिकठिकाणी छोटी आंदोलनं, बैठका, कँडल मार्च आणि सोशल मीडियाच्या माध्यमातून लोकांनी नोटाला मतदान करावं यासाठी काँग्रेसने जोर लावला आहे.

इंदौरमध्ये भाजपसमोर कोणाचे आव्हान नाही. भाजपचे विद्यमान खासदार आणि यावेळीही तिकीट मिळालेले शंकर ललवानी यांना विजयाचा पूर्ण विश्वास आहे.काँग्रेस मैदानात नसली तरी १३ अपक्ष उमेदवार रिंगणात आहेत. असे असले तरी इंदौरमध्ये निवडणूक एकतर्फीच होण्याची दाट शक्यता आहे. पण, काँग्रेसने निषेध म्हणून लोकांना नोटाला मत देण्याचे आवाहन केले आहे.

इंदौर हा मध्य प्रदेशातील सर्वात मोठा मतदारसंघ आहे. मतदारसंघात २५.१३ लाख मतदार आहेत. १९८९ पासून इंदौरवर भाजपचाच ताबा राहिला आहे. २०१९ च्या लोकसभा निवडणुकीमध्ये काँग्रेसला ३१ टक्के मत मिळाली होती. इंदौरमध्ये १३ अपक्ष उमेदवार असल्याने आणि त्यांनी माघार घेतली नसल्याने सुरतसारखी बिनविरोध निवडणूक इथे होणार नाही.

मतदारसंघातील स्थिती पाहता भाजपने इथे खर्चासाठी हात आखडता घेतला आहे. प्रचाराचा जोर देखील कमी आहे. भाजपला मतदारसंघात मोठ्या विजयाची खात्री आहे. भाजपचे प्रवक्ते अलोक दुबे म्हणाले की, ''भाजपचा विजय होईल यात कसलीच शंका नाही.पण, काँग्रेस नोटाला समर्थन देऊन नकारात्मक राजकारण करत आहे. लोकशाहीवरील हा हल्ला आहे.''