Pegasus Case : केंब्रिज विद्यापीठात राहुल गांधींनी ठोकलं मोदींविरोधात भाषण; भाजपनंही दिलं सडेतोड उत्तर

काँग्रेसचे माजी अध्यक्ष राहुल गांधी (Rahul Gandhi) यांनी लंडनमधील केंब्रिज विद्यापीठात (Cambridge University London) केलेल्या भाषणात पेगासस प्रकरणाबाबत (Pegasus Case) मोदी सरकारला चांगलंच धारेवर धरलं.

राहुल गांधींच्या टीकेनंतर केंद्रीय मंत्री आणि भाजप नेते अनुराग ठाकूर (Anurag Thakur) यांनी पलटवार केलाय. ते म्हणाले, राहुल गांधी पुन्हा एकदा परदेशी भूमीत जावून भारताची बदनामी करत आहेत. पंतप्रधान मोदींच्या नेतृत्वाखाली जगामध्ये भारताचा सन्मान वाढला आहे, असं मोठे नेते बोलतात. राहुल गांधींनी निदान इटलीच्या पंतप्रधानांचं तर ऐकायला हवं होतं, असा टोला त्यांनी लगावला.

ठाकूर म्हणाले, 'परदेशात जावून पंतप्रधान आणि देशाची बदनामी करणं ही राहुल गांधींची सवय बनलीये. कधी ते स्वतः करतात, तर कधी ते त्यांच्या परदेशी मित्रांना करायला लावतात. महिला, मजूर, गरीब यांच्या हिताचा विचार करणारा मजबूत पंतप्रधान आपल्याला मिळाला आहे. मात्र, त्यांची बदनामी ते वारंवार करत आहेत.'

भारत ही जगातील सर्वात वेगानं वाढणारी अर्थव्यवस्था आहे. विक्रमी एफडीआय भारतात येत आहे. राहुल गांधी मीडियाला बदनाम करण्याचा प्रयत्न करत आहेत. एवढंच नाही तर देशाच्या संवैधानिक संस्था आणि न्यायपालिकेची बदनामी करण्याची आणि नंतर कोर्टाची माफी मागण्याची एकही संधी ते सोडत नाहीत, असा हल्लाबोलही ठाकूर यांनी राहुल गांधींवर केला.

माझ्या फोनमध्ये 'पेगासस' होता - राहुल गांधी

केंब्रिज जज बिझनेस स्कूलमध्ये (केंब्रिज जेबीएस) राहुल गांधी म्हणाले, 'माझ्या स्वतःच्या फोनमध्ये पेगासस होता. अनेक बड्या नेत्यांच्या फोनमध्येही पेगासस होता. अनेक गुप्तचर अधिकार्‍यांनी मला फोन करून सावधपणे बोलण्याचा सल्ला दिला. विरोधी पक्षांच्या नेत्यांचे फोन सतत टॅप केले जात आहेत. पेगाससच्या मुद्द्यावर त्यांनी यापूर्वीही अनेकदा सरकारला धारेवर धरलं आहे.