गिरिराज सिंह शशी थरुरांच्या कानात काय खुसफुसले? थरुरांनी स्वत:चं दिलं शालजोडीतलं उत्तर

नवी दिल्ली : संसदेतील बजेट सत्राचा दुसरा टप्पा चांगलाच गोंधळाचा ठरला आहे. शेतकरी आंदोलन, महागाई यासहित विरोधी पक्षांनी केंद्र सरकारवर अनेक मुद्यांवर हल्लाबोल केला आहे. यामुळे लोकसभा आणि राज्यसभा या दोन्हीही सदनांची कार्यवाही वारंवार मध्ये रोखावी लागली. या दरम्यान संसद परिसरात नेत्यांच्या भेटीगाठीचे फोटो समोर आले आहेत. सोशल मीडियावर काल असाच एक फोटो समोर आलाय ज्यामध्ये काँग्रेस आणि भाजपचे दोन वरिष्ठ नेते अत्यंत जवळ येऊन बोलताना दिसत आहेत. 

हा फोटो आहे केंद्रीय मंत्री गिरिराज सिंह आणि माजी केंद्रीय मंत्री शशी थरुर यांचा. या फोटोत दिसतंय की गिरिराज सिंह शशी थरुर यांच्या कानामध्ये काहीतरी सांगत आहेत. दोघांनीही आपल्या चेहऱ्यावर मास्क परिधान केला आहे. ट्विटरवर हा फोटो व्हायरल झाल्यानंतर लोक वेगवेगळ्या प्रकारचे अंदाज बांधू लागले की, अशी नेमकी काय गोष्ट आहे की जी गिरिराज सिंह शशी थरुरांच्या कानात सांगत आहेत? आणि आता या गोष्टीचा खुलासा स्वत: शशी थरुर यांनीच केला आहे. 

हेही वाचा - ममतांच्या पायाला प्लास्टर; 2 मे ला जनतेची दिसेल ताकद, भाजपला 'तृणमूल'चा इशारा

काँग्रेसचे खासदार शशी थरुर यांनी या फोटोबाबत ट्विट करत म्हटलंय की, हा फोटो तेंव्हाचा आहे, जेंव्हा मी गिरिराज सिंह यांना सांगत होतो की पशुपालनासाठी एका मोठ्या मंत्रालयाअंतर्गत येणारा मत्स्य पालन विभाग त्या मोठ्या स्वतंत्र मत्स्य पालन मंत्रालयाच्या तोलामोलाचा नाहीये, ज्याची मागणी काँग्रेस आणि राहुल गांधी करत आहेत. अलिकडेच राहुल गांधींनी पुदुच्चेरीमधील आपल्या दौऱ्यात मत्स्य पालनासाठी स्वतंत्र अशा मंत्रालयाची मागणी केली होती. 

राहुल गांधींनी काही दिवसांपूर्वी ट्विट करुन म्हटलं होतं की, पंतप्रधानजी, मच्छीमारांसाठी एक स्वतंत्र अशा मत्स्य मंत्रालयाची गरज आहे. मंत्रालया अंतर्गत एखाद्या विभागाची नाही. राहुल गांधींच्या या मागणीवर पंतप्रधान मोदींशिवाय भाजपच्या अनेक नेत्यांनी निशाणा साधला होता. गिरिराज सिंह यांनी देखील टीका करताना राहुल गांधींना शाळेत पाठवा असं म्हटलं होतं.