अंध गिर्यारोहकाने एव्हरेस्ट केले सर

काठमांडू/नवी दिल्ली - जगातील सर्वात उंच शिखर एव्हरेस्ट शिखर (Everest Mountain) सर करण्याचे स्वप्न लाखो गिर्यारोहक (Trekking) बाळगून असतात. कोणत्या ना कोणत्या कारणाने अपंगत्व आलेले नागरिक, गिर्यारोहक देखील एव्हरेस्ट सर करण्याची इच्छाशक्ती बाळगून असतात. या जोरावरच चीनचे ४६ वर्षीय झांग होंग (Zhang Hong) यांनी माउंट एव्हरेस्ट शिखर पादाक्रांत केले असून ते अंध (Blind) आहेत. एव्हरेस्टरवर जाणारे ते जगातील तिसरे तर आशियातील पहिले अंध गिर्यारोहक ठरले. (Blind Climber Climbed Everest Success)

झांग यांनी गेल्या आठवड्यात एव्हरेस्ट शिखरावर चढाई केली. त्यांच्या-समवेत तीन मार्गदर्शक होते. चीनच्या दक्षिण पश्‍चिम शहर चोंगकिंग येथे जन्मलेले झांग होंग यांना ग्लुकोमामुळे वयाच्या २१ व्या वर्षी दृष्टी गमवावी लागली. दृष्टी गेल्यानंतरही त्यांची जिद्द कायम होती आणि त्यांनी ८८४९ मीटर उंचीचे शिखर गाठले. गिर्यारोहक होंग यांनी दृष्टिहीन अमेरिकी गिर्यारोहक एरिक वेहेनमेयर यांच्यापासून प्रेरणा घेत माउंट एव्हरेस्ट वर चढाई करण्याचा निर्णय घेतला. वेहेनमेयर यांनी २००१ मध्ये माउंट एव्हरेस्टवर चढाई केली होती. गिर्यारोहक होंग यांनी मित्र कियांग यांच्यासमवेत प्रशिक्षण घेतले होते.

चढाई करताना भयभीत होतो

गियारोहक झांग म्हणाले की, एव्हरेस्टवर मोहीम सुरू केली, तेव्हा मी भयभीत झालो होतो. कारण मी कोठे आणि कसा जात आहे, हे काहीच समजत नव्हते. सतत मी अडखळत होतो. अनेक ठिकाणी पडलो देखील. हा प्रवास कठीण असला तरी या आव्हानांचा सामना नक्की करू, असे ठरवले होते. गिर्यारोहणामध्ये आव्हाने आणि धोके असतातच आणि यातच खरे कौशल्य पणाला लागते.