दहशतवादाच्या मुद्यावर 'राजकारण' करु नका; ब्रिक्स सदस्य राष्ट्रांना मोदींचा सल्ला

चीननं आयोजित केलेल्या 14 व्या ब्रिक्स परिषदेत पंतप्रधान नरेंद्र मोदी सहभागी झाले होते. कोरोनामुळं सलग तिसऱ्या वर्षी ब्रिक्सचं आयोजन साध्या पध्दतीनं करण्यात आलं होतं. परिषदेत पीएम मोदींनी अनेक मुद्द्यांवर आपलं मतं मांडलं. पंतप्रधान मोदींनी (Narendra Modi) ब्रिक्स वर्च्युअल समिटमध्ये (BRICS Virtual Summit) म्हटलं की, सदस्य राष्ट्रांनी एकमेकांच्या सुरक्षेच्या समस्या समजून घेतल्या पाहिजेत. दहशतवादाच्या मुद्यांवर परस्पर सहकार्य केलं पाहिजे. या संवेदनशील मुद्द्याचं 'राजकारण' केलं जाऊ नये, असं त्यांनी स्पष्टपणे सांगितलं.

पाकिस्तानस्थित (Pakistan) दहशतवादी अब्दुल रहमान मक्की (Terrorist Abdul Rehman Makki) याला संयुक्त राष्ट्र समिती (UN Sanctions Committee) अंतर्गत आंतरराष्ट्रीय दहशतवादी म्हणून घोषित करण्याचा भारत आणि अमेरिकेचा संयुक्त प्रस्ताव चीननं रोखल्यानंतर, 'ब्रिक्स'मध्ये याबाबत चर्चा झाली. एका निवेदनात MEA नं (Ministry of External Affairs) शुक्रवारी समारोप झालेल्या दोन दिवसीय BRICS (ब्राझील-रशिया-भारत-चीन-दक्षिण आफ्रिका) शिखर परिषदेत पंतप्रधानांच्या सूचना आणि टिप्पण्यांचा तपशील प्रदान केला.

BRICS सदस्य म्हणून आपण एकमेकांच्या सुरक्षेच्या समस्या समजून घेतल्या पाहिजेत आणि दहशतवाद्यांना घोषित करण्यात परस्पर सहकार्य केलं पाहिजे. या संवेदनशील मुद्द्याचं राजकारण केलं जाऊ नये, असं MEA नं नमूद केलं. मक्की हा भारतात विशेषतः जम्मू आणि काश्मीरमध्ये हिंसाचाराचा अवलंब करण्यासाठी तरुणांची भरती आणि कट्टरपंथी बनवत आहे. दरम्यान, ब्रिक्स परिषदेत पंतप्रधानांनी आफ्रिका, मध्य आशिया, दक्षिण पूर्व आशिया आणि पॅसिफिक ते कॅरिबियनपर्यंत भारताच्या विकास भागीदारीवर प्रकाश टाकला, असंही MEA नं म्हटलं. BRICS जगातील पाच सर्वात मोठ्या विकसनशील देशांना एकत्र आणतं. जे जागतिक लोकसंख्येच्या 41 टक्के, जागतिक जीडीपीच्या 24 टक्के आणि जागतिक व्यापाराचं 16 टक्के प्रतिनिधित्व करतात.