जम्मू काश्मीरमध्ये चकमक ; दोन दहशतवाद्यांचा खात्मा

जम्मू : जम्मू काश्मीरच्या बडगाव जिल्ह्यात सुरक्षा दलाचे जवान आणि दहशतवाद्यांमध्ये चकमक झाली. ही चकमक आज (गुरुवार) झगू अरिझल परिसरात घडली. या चकमकीत दोन दहशतवाद्यांचा खात्मा करण्यात सुरक्षा दलाच्या जवानांना यश आले. स्थानिक पोलिस आणि सुरक्षा दलाच्या वतीने ही संयुक्त कारवाई करण्यात आली.

बडगाव जिल्ह्यात सुरक्षा दलाचे जवान आणि दहशतवाद्यांमध्ये आज सकाळपासून चकमक सुरु होती. दहशतवाद्यांकडून करण्यात आलेल्या गोळीबाराला भारतीय सुरक्षा दलाकडून चोख प्रत्युत्तर देण्यात आले. या प्रत्युत्तरादरम्यान दोन दहशतवाद्यांचा खात्मा करण्यात सुरक्षा दलाला यश आले. या चकमकीनंतर वाहनांवर दगडफेक करण्यात आली. तसेच या मीडियाच्या आऊटडोअर ब्रॉडकास्टिंग व्हॅनचे (ओबी) यामध्ये मोठे नुकसान झाले.

याबाबत जम्मू-काश्मीर पोलिसांनी सांगितले, की या शोधमोहिमेदरम्यान दहशतवाद्यांकडून सुरक्षा दलावर गोळीबार करण्यात आला. त्यानंतर सुरक्षा दलाच्या जवानांनी या गोळीबाराला चोख प्रत्युत्तर दिले.

''आम्ही या संघटनेला काही काळासाठी ट्रॅकिंगवर ठेवले होते. आगामी पंचायत निवडणुकीत गोंधळ निर्माण करण्याचा प्रयत्न त्यांच्याकडून केला जाण्याची शक्यता होती'', अशी माहिती कर्नल ए. के. नायर यांनी दिली.