'या' केंद्रीय कर्मचाऱ्यांसाठी गोड बातमी! पगारात मिळणार अतिरिक्त पैसे

नवी दिल्ली : केंद्र सरकारने रेल्वेच्या कर्मचाऱ्यांबाबत (Railway employee) मोठा निर्णय घेतला आहे. सरकारकडून आर्थिक वर्ष २०२०-२१ बोनस (PLB) देण्याची घोषणा करण्यात आली असून बोनसचे हे पैसे ७८ दिवसांच्या पगाराइतके असतील. आरपीएफ आणि आरपीएसएफ कर्मचाऱ्यांना वगळता रेल्वेच्या सर्वच पात्र कर्मचाऱ्यांना हा बोनस दिला जाणार आहे.

केंद्र सरकारच्या या निर्णयामुळे रेल्वेच्या जवळपास ११.५६ लाख कर्मचाऱ्यांना या बोनसचा फायदा होण्याची शक्यता आहे. योग्य रेल्वे कर्मचाऱ्यांना दसऱ्याच्या सुट्टीवेळी हा बोनस दिला जातो. आर्थिक वर्ष २०१० -११ पासून २०१९-२० पर्यंत बोनस देण्यात आला होता. आता २०२०-२१ चा ७८ दिवसांच्या पगाराइतका बोनस दिला जाणार असल्याचे केंद्र सरकारने म्हटले आहे. यामुळे कर्मचाऱ्यांच्या कामामध्ये सुधारणा होणार असल्याचे केंद्र सरकारने म्हटलं आहे.

सर्व कर्मचाऱ्यांना बोनस देण्यासाठी केंद्र सरकारचे जवळपास १९८४.७३ कोटी रुपये खर्च होण्याची शक्यता आहे. केंद्रीय मंत्रिमंडळाने पात्र रेल्वे कर्मचाऱ्यांना पीएलबीसाठी दरमहा 7,000 रुपये वेतन गणना मर्यादा निश्चित केली आहे. प्रत्येक पात्र रेल्वे कर्मचाऱ्याला 78 दिवसांसाठी जास्तीत जास्त देय रक्कम 17,951 रुपये असेल, असेही केंद्राकडून सांगण्यात आले आहे.