झाडाला उलटं लटकवून तरुणाला जबर मारहाण, अल्पवयीनासह पाच जणांना अटक

छत्तीसगडमधून (Chhattisgarh) एक धक्कादायक प्रकरण समोर आलंय. येथील बिलासपूर जिल्ह्यात (Bilaspur District) एका तरुणाला झाडाला उलटं लटकवून मारहाण केल्याचा एक व्हिडिओ सोशल मीडियावर (Social Media) चांगलाच व्हायरल झालाय. त्यानंतर पोलिसांनी या प्रकरणी एका अल्पवयीनासह पाच जणांना अटक केलीय.

पोलीस अधिकाऱ्यानं सांगितलं की, बिलासपूरच्या सिपत पोलीस स्टेशन (Bilaspur Sipat Police Station) हद्दीतील उचाभट्टी गावात तरुणाला मारहाण केल्याचं प्रकरण समोर आलंय. यानंतर पोलिसांनी 15 वर्षीय अल्पवयीन मुलासह पाच जणांना अटक केलीय. यात मनीष खरे, शिवराज खरे आणि जानू भार्गव यांना शुक्रवारी सायंकाळी उशिरा अटक केली, तर भीम केसरवाणी आणि एका 15 वर्षीय अल्पवयीन मुलाला रविवारी सकाळी अटक करण्यात आलीय. पोलिसांनी सांगितलं की, या घटनेतील पीडित महावीर हा सूर्यवंशी जिल्ह्यातील (Suryavanshi District) रतनपूर भागातील रहिवासी आहे. सिपत परिसरातील उचभट्टी गावात राहून तो मजूर आणि चौकीदार म्हणून काम करतो.

असं समोर आलंय की, 24-25 एप्रिलच्या मध्यरात्री मनीषनं महावीरला घरात घुसण्याचा प्रयत्न करताना पाहिलं होतं. यावेळी महावीर पळून जाण्यात यशस्वी झाला. मात्र, दुसऱ्या दिवशी सोमवारी मनीषनं त्याला पकडलं आणि त्याच्यावर चोरीचा प्रयत्न केल्याचा आरोप करत पोलिसांच्या हवाली केलं. मनीषनं महावीरविरुद्ध पोलिसांत गुन्हा नोंदवला नाही, त्यामुळं पोलिसांनी महावीरला इशारा देऊन सोडून दिलं. नंतर मनीषनं महावीरवर आरोप केला की, बुधवारी रात्री महावीर पुन्हा त्याच्या घरी पोहोचला आणि बाहेर पार्क केलेल्या त्याच्या मोटरसायकलचं नुकसान करून पळून गेला. गुरुवारी, मनीष आणि इतर चार आरोपींनी महावीरला पकडलं आणि कथितरित्या त्याला गावातील वीटभट्टीजवळील झाडाला उलटं टांगलं आणि निर्दयपणे मारहाण केलीय. या मारहाणीचा व्हिडिओ मोठ्या प्रमाणात व्हायरल आहे.