Amit Shah : भारताच्या एक इंचही जमिनीवर कब्जा करण्याचं धाडस कोणाच्यात नाही; अमित शाहांचा थेट चीनला इशारा

बेंगळुरू : तवांगमध्ये (Tawang) भारतीय लष्कर (Indian Army) आणि चिनी सैनिकांत (Chinese Soldiers) झालेल्या चकमकीवरून अमित शाहांनी (Amit Shah) चीनला चांगलंच सुनावलंय.

सीमेवर ITBP जवान असताना LAC वर चीन काहीही करू शकतो असा विचार करण्याची मला गरज वाटत नाही, असं शाहांनी म्हटलंय. ITBP च्या निवासी आणि अनिवासी परिसरांच्या उद्घाटन समारंभात गृहमंत्री अमित शाह बोलत होते.

गृहमंत्री पुढं म्हणाले, 'आयटीबीपी हे आमचं सुरक्षा दल आहे, जे अतिदुर्गम भागात कार्यरत आहे. 42 अंश सेल्सिअस तापमानात देशाच्या सीमांचं रक्षण करण्यासाठी किती मजबूत मनोबल लागतं याची आपण कल्पनाही करू शकत नाही. जेव्हा आमचे आयटीबीपी जवान सीमेवर तैनात असतात, तेव्हा भारताच्या एक इंच जमिनीवरही कोणाचं अतिक्रमण करण्याचं धाडस होत नाही.'

आयटीबीपीच्या समारंभात गृहमंत्री म्हणाले, भारताच्या विकासाच्या प्रवासात चांगला कायदा आणि सुव्यवस्था महत्त्वाची आहे. आमचे आयटीबीपीचे जवान भारत-चीन सीमेवर पहारा देत आहेत, त्यामुळं कशाचीही चिंता नाही. ITBP जवानांचं शौर्य सर्वज्ञात आहे. म्हणूनच, लोक त्यांना 'हिमवीर' म्हणतात, असंही त्यांनी सांगितलं.