नवी दिल्ली - संसदेच्या दोन्ही सभागृहात सलग दुसऱ्या दिवशी मंगळवारी गोंधळामुळे कामकाज होऊ शकले नाही. दोन्ही सभागृहे दुपारी दोन वाजताच दिवसभरांसाठी तहकूब करण्यात आली. पेट्रोल-डिझेल व स्वयंपाकाच्या गॅसच्या दरवाढीवर कामकाज तहकूब करून चर्चेच्या मागणीचा आग्रह विरोधी पक्षांनी धरला आणि सरकारने त्यास नकार दिल्याने कामकाज होऊ शकले नाही.
- पुण्याच्या बातम्या वाचण्यासाठी येथे ► क्लिक करा
लोकसभेत कॉंग्रेसचे मनीष तिवारी यांनी या दरवाढीवर स्थगन प्रस्तावाची सूचना दिली होती. या तीन जीवनावश्‍यक वस्तु आहेत आणि त्यांच्या दरात सातत्याने वाढ होत असल्याने जनतेचे जीवन असह्य होत चालले आहे व म्हणूनच या विषयास सर्वोच्च प्राधान्य देऊन सभागृहाचे अन्य कामकाज स्थगित ठेवून चर्चा झाली पाहिजे, असे विरोधी पक्षांनी दिलेल्या तहकुबी सूचनांमध्ये नमूद करण्यात आले होते. राज्यसभेत बहुजन समाज पक्षाचे नेते सतीशचंद्र मिश्रा यांनीही प्रश्‍नोत्तराचा तास स्थगित ठेवून या ज्वलंत विषयावर चर्चेची मागणी करणारी सूचना सभापतींकडे सादर केली होती. कॉंग्रेस, द्रमुक, शिवसेना आणि डाव्या पक्षांतर्फे स्थगन प्रस्तावाच्या सूचना देण्यात आल्या होत्या.
राज्यसभेत अध्यक्ष वेंकय्या नायडू यांनी तर लोकसभेत सभापती ओम बिर्ला यांनी स्थगन प्रस्तावाच्या सर्व सूचना फेटाळून लावल्या आणि अर्थ विधेयकांवरील चर्चेच्या वेळी सदस्य या मुद्यांवर तपशिलाने बोलू शकतील, असे त्यांनी सुचविले. सर्वसाधारणपणे लोकमहत्वाच्या आणि अतितातडीच्या ताज्या विषयांवर स्थगन प्रस्तावाद्वारे चर्चेची संधी विरोधी पक्षांना नियमानुसार उपलब्ध असते. या सर्व अटीमध्ये पेट्रोल-डिझेल व स्वयंपाकाच्या गॅसच्या दरवाढीचा विषय समाविष्ट होत असल्याने आणि या प्रस्तावाद्वारे सरकारवर ठपका ठेवण्याची तरतूद असल्याने विरोधी पक्ष ही चर्चा याच पद्धतीने करण्यावर आग्रही आहेत. परंतु संसदेच्या दोन्ही सभागृहात बहुमत असूनही सरकार मात्र बचावाचा पवित्रा घेऊन चर्चा टाळत असल्याचे चित्र आहे.
दोन्ही सभागृहे पूर्ववत पद्धतीने सुरू
आजपासून संसदेची दोन्ही सभागृहे पूर्ववत पद्धतीने म्हणजेच सकाळी ११ वाजता प्रश्‍नोत्तराच्या तासाने सुरु झाली. परंतु विरोधी पक्षांनी चर्चेच्या मागणीवरून कामकाज रोखून धरले. तरीही पीठासीन अधिकाऱ्यांनी नेटाने कामकाज रेटण्याचा प्रयत्न केला परंतु गोंधळामुळे त्यात यश आले नाही. दोन वाजता दोन्ही सभागृहांचे कामकाज दिवसभरासाठी तहकूब केले.
Edited By - Prashant Patil
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.