Congress : श्रीमंत आमदारांच्या बंधूंना उमेदवारी

बंगळूर : लोकसभा निवडणुकीसाठी काँग्रेसने देशभरातील ३९ मतदारसंघांसाठी उमेदवार जाहीर केले. कर्नाटकातील सात मतदारसंघांसाठी उमेदवारही जाहीर केले. पहिल्या यादीत देशातील दोन सर्वात श्रीमंत आमदारांच्या बंधूंना काँग्रेसने उमेदवारी दिली आहे. ते दोघेही कर्नाटकातील आहेत हे विशेष.

बंगळूर ग्रामीण, शिमोगा, तुमकूर, मंड्या, विजापूर, हावेरी आणि हासन मतदारसंघांसाठी उमेदवार जाहीर केले आहेत. पैकी बंगळूर ग्रामीण लोकसभा मतदारसंघाचे डी. के. सुरेश आणि मंड्याचे वेंकटरामण गौडा ऊर्फ ​​स्टार चंद्रू हे ते श्रीमंत आमदारांचे भाऊ आहेत.

उपमुख्यमंत्री शिवकुमार देशातील सर्वात श्रीमंत आमदारांच्या यादीत पहिल्या स्थानावर आहेत. त्यांची एकूण संपत्ती १,४१३ कोटी रुपये आहे. त्यांचे भाऊ सुरेश यांना बंगळूर ग्रामीणसाठी उमेदवार आहेत. श्रीमंतांमध्ये गौरीबिदनूर येथील अपक्ष आमदार के. एच. पुट्टास्वामी गौडा हे दुसऱ्या क्रमांकावर आहेत. त्यांची एकूण संपत्ती १,२६७ कोटी रुपये आहे. त्यांनी सत्ताधारी काँग्रेसला पाठिंबा जाहीर केला आहे. त्यांचे भाऊ व्यंकटरमण गौडा ऊर्फ ​​स्टार चंद्रू यांना मंड्या मतदारसंघातून उमेदवारी मिळाली आहे.