Loksabha Election : काँग्रेस कर्नाटकात लोकसभेच्या 'इतक्या' जागा जिंकणार; मुख्यमंत्र्यांनी आकडाच सांगून टाकला

अथणी : भाजपने भ्रष्टाचार, दरवाढ, धार्मिक राजकारण करून राज्याची आर्थिक नासधूस केली आहे. काँग्रेस (Congress) पक्षाने १३५ जागा जिंकल्या आहेत, हे भाजपच्या भीतीचे कारण आहे. २०२४ च्या लोकसभा निवडणुकीत काँग्रेस पक्ष कर्नाटकात किमान २० जागा जिंकेल, असा विश्वास मुख्यमंत्री सिद्धरामय्या (CM Siddaramaiah) यांनी व्यक्त केला.

अथणी येथे दाखल झाल्यानंतर ते पत्रकारांशी बोलत होते. कंत्राटदारांच्या आरोपावर बोलताना ते म्हणाले, गेल्या तीन वर्षांपासून ठेकेदाराची बिले अदा केलेली नाहीत. आमचे सरकार कोणत्याही कंत्राटदाराचे बिल देण्यास अडथळा आणणार नाही. भाजपकडे लोकांची तक्रार करण्यासारखे काही नाही. त्यामुळे ते खोटे आरोप करत आहेत.

खासदार शोभा करंदलाजे आणि इतरांनी राहुल गांधींविरोधात केलेल्या तक्रारीवर प्रतिक्रिया देताना मुख्यमंत्री म्हणाले, हे प्रकरण लोकसभा अध्यक्षांसमोर आहे. राहुल गांधी यांनी अधिवेशनात अविश्वास ठरावावेळी केंद्र सरकारवर कडाडून टीका केल्यामुळे त्यांनी तक्रार केली होती. मंत्री चेलुवरायस्वामी यांच्यावरील आरोपाबाबत त्यांनी हा आरोप कुठे ऐकला, असा सवाल केला.

आत्महत्या केलेल्या संतोष पाटील या कंत्राटदाराच्या प्रकरणाबाबत त्यांच्या कुटुंबीयांनी पोलिसांकडून न्याय न मिळाल्याने ते सीआयडीकडे सोपवावे, अशी मागणी निवेदनाद्वारे केली आहे. याबाबत आपण विचार करू, कायदा विभागाशी चर्चा करून निर्णय घेऊ, असे ते म्हणाले.

आपल्या सरकारवर लादेनचे सरकार असल्याची टीका माजी मंत्री आर. अशोक यांनी केली हे पाहता त्यांना लोकसभा निवडणूक हरण्याची भीती आहे. त्यामुळे ते हतबल झाले आहेत, असे मुख्यमंत्री म्हणाले.

पोलिसांनी अपंग व्यक्तीला मारहाण केल्याबद्दल बोलताना ते म्हणाले, पोलिसांनी जे केले ते चुकीचे होते. मारहाण करणाऱ्या अधिकाऱ्याला निलंबित करण्यात आले असून त्याची विभागीय चौकशी करण्यात आली आहे. गैरप्रकार करणाऱ्यांवर कारवाई करण्यात येत असल्याचे त्यांनी सांगितले.