सोनिया गांधींना पुन्हा ईडीचं समन्स; काँग्रेस करणार देशव्यापी आंदोलन

आज पक्षानं एक अत्यंत महत्त्वाची बैठक बोलावली असून त्यात सर्व सचिव, प्रदेश प्रभारी, पीसीसी प्रमुखांना बोलावण्यात आलंय. या बैठकीत भारत जोडो यात्रा आणि संघटनेच्या कार्यक्रमावर चर्चा होणार आहे. या बैठकीत पक्षाचे प्रमुख सहभागी होणार असून या आंदोलनादरम्यान लोकांपर्यंत पोहोचण्यासाठी मोर्चा आणि इतर कार्यक्रमांवरही चर्चा होणार आहे. 18 जुलैपासून संसदेचं पावसाळी अधिवेशन सुरू होत आहे. अशा स्थितीत काँग्रेसचे (Congress) खासदारही सभागृहात आंदोलन करू शकतात. (National Herald Case)

काँग्रेस नेते मल्लिकार्जुन खर्गे (Mallikarjun Kharge) म्हणाले, 'काँग्रेस अध्यक्षा सोनिया गांधी (Sonia Gandhi) या शेरनी आहेत. त्यांना असल्या नोटिसींची भीती वाटत नाही. अशा अनेक गोष्टी त्यांनी पाहिल्या आहेत. त्यामुळं त्या ईडी (ED Office) कार्यालयात जातील.' नॅशनल हेराल्ड प्रकरणी (National Herald case) ईडीनं सोनिया गांधी यांना समन्स बजावलं असून, त्यांना 21 जुलै रोजी सकाळी 11 वाजता ईडी कार्यालयात हजर राहण्यास सांगितलंय. (ED Summons to Sonia Gandhi)

प्रकृती अस्वास्थ्यामुळं सोनिया गांधी यापूर्वी ईडीच्या कार्यालयात जाऊ शकल्या नाहीत, त्यांना 8 जून रोजी हजर राहण्यासाठी समन्स बजावण्यात आले होते. पण, त्यावेळी सोनिया गांधींना कोरोनाची लागण झाली आणि त्यांना रुग्णालयात दाखल करण्यात आलं. ईडीला या संपूर्ण प्रकरणात सोनिया गांधी आणि राहुल गांधी (Rahul Gandhi) यांचे जबाब नोंदवायचे आहेत. गेल्या महिन्यात राहुल गांधी यांची ईडीनं अनेकवेळा चौकशी केली होती.