कोरोनाच्या वाढत्या उद्रेकानंतर उपमुख्यमंत्र्यांचं मोठं विधान; सिसोदिया म्हणाले..

नवी दिल्ली : दिल्लीत कोरोनाचा (Coronavirus) वेग झपाट्यानं वाढू लागलाय. कोरोना बाधित रुग्णांची संख्या देखील 1,729 वर पोहोचलीय. तर, दैनंदिन संसर्ग दर 7.72 टक्के नोंदवला गेलाय. अशा परिस्थितीत कोरोना (Coronavirus in Delhi) आता अधिक वेगानं वाढण्याची शक्यता आहे. दिल्ली सरकारही (Delhi Government) या वाढत्या प्रकरणांबाबत पूर्णपणे सतर्क झालं असून आगामी काळात गरज पडल्यास कठोर पावलं उचलण्याची शक्यताही वर्तवली जात आहे.

दिल्लीचे उपमुख्यमंत्री मनीष सिसोदिया (Manish Sisodia) यांनी एका कार्यक्रमादरम्यान सांगितलं की, गेल्या दोन वर्षांपासून आम्ही कोरोना महामारीशी लढत आहोत. कोरोनाचा प्रादुर्भाव झपाट्यानं वाढला तर आगामी काळात गरज पडल्यास आणखी कठोर पावलं उचलली जातील, असे त्यांनी संकेत दिलेत. आता दररोज 100 च्या खाली नोंद झालेल्या कोरोना बाधितांची संख्या 500 हून अधिक नोंदवली जात आहे. अशा परिस्थितीत आगामी काळात त्यांची संख्या झपाट्यानं वाढण्याची शक्यता आहे.

सध्या सरकारकडून दररोज 10 ते 12 हजार लोकांची कोरोना चाचणी केली जात आहे. हीच परिस्थिती कायम राहिल्यास बाधित लोकांचा शोध घेता यावा यासाठी सरकारला दैनंदिन चाचणी संख्या वाढवावी लागेल. तर, दुसरीकडं दिल्लीचे मुख्यमंत्री अरविंद केजरीवाल (Arvind Kejriwal) देखील कोरोनाबाबत घाबरण्याची गरज नसल्याचं सांगत आहेत. सिसोदिया पुढं म्हणाले, कोरोनाचा सामना करण्यासाठी सर्वांनी सतर्क रहायला हवं. सध्या रुग्णालयात फारसे रुग्ण नाहीत, त्यामुळं फार त्रासाची बाब नाहीय, असंही त्यांनी स्पष्ट केलं. दरम्यान, कोरोना संसर्गावर नियंत्रण मिळवण्यासाठी दिल्ली आपत्ती व्यवस्थापन प्राधिकरणाची (DDMA) 20 एप्रिल रोजी बैठक बोलावण्यात आलीय.