देशात सध्या ओमिक्रॉनचे कुठे आणि किती रुग्ण? वाचा सविस्तर

नवी दिल्ली : भारतासहित जगातील अनेक देशांमध्ये सध्या कोरोनाचा नवा व्हेरियंट असलेला 'ओमिक्रॉन' हा हातपाय पसरतो आहे. हा व्हेरियंट अधिक संसर्गजन्य असल्याने तज्ज्ञांनी चिंता व्यक्त केली आहे. आज दिवसभरात देशात ओमिक्रॉनने बाधित अनेक रुग्ण सापडले आहेत. आज देशाची राजधानी दिल्लीमध्येही रुग्ण सापडले आहेत तर दुसरीकडे महाराष्ट्रातील पुण्यात देखील काही रुग्ण आढळल्याने चिंता वाढली आहे. याआएधी गुजरातमधून एक, महाराष्ट्रातून एक आणि कर्नाटकातून दोन ओमिक्रॉनचे रुग्ण सापडले होते. मात्र, आता या रुग्णसंख्येत आजच्या दिवशी वाढ झाली आहे.

देशात आतापर्यंत कर्नाटक, गुजरात, महाराष्ट्र, दिल्ली आणि राजस्थानमध्ये कोरोनाच्या ओमिक्रॉन व्हेरियंटचे एकूण 21 रुग्ण सापडले आहेत. राजस्थानमध्ये नऊ, महाराष्ट्रात आठ, कर्नाटकात दोन आणि गुजरात आणि दिल्लीमध्ये प्रत्येकी एक असे रुग्ण सापडलेआहेत.

राजस्थानमध्ये ओमिक्रॉनचे नऊ रुग्ण

राजस्थानमध्ये दक्षिण आफ्रिकेहून आलेल्या कुटुंबामधील नऊ लोकांना ओमिक्रॉनने बाधित केलं आहे. या सगळ्यांना याआधीच आरयूएचएसमध्ये भरती करण्यात आलं होतं. त्यांच्या संपर्कात आलेले इतर पाच जण देखील संक्रमित आढळलेले आहेत. त्यांना देखील भरती करण्यात आलं आहे.

महाराष्ट्रात आठ लोक ओमिक्रॉनबाधित

कोरोनाचा नवा व्हेरियंट ओमिक्रॉननं आता महाराष्ट्राच्या चिंतेत भर टाकली आहे. कारण डोंबिवलीपाठोपाठ पुणे आणि पिंपरीमध्ये ओमिक्रॉनचे रुग्ण आढळून आले आहेत. त्यामुळं पुणेकरांच्या चिंतेतही भर पडली आहे. यामुळं महाराष्ट्रात ओमिक्रॉनचे एकूण आठ रुग्ण आढळून आले आहेत.