दलित व्यक्तीचं अपहरण करुन मारहाण; मूत्र पिण्यासंही भाग पाडलं

नुकतीच देशाची प्रजासत्ताकाची ७३ वर्ष पुर्ण (Republic Day of India) झाली, मात्र अजूनही दलित अत्याचारांच्या (Dalit Atrocities) घटनांना चाप बसलेली नाही. अशीच एक देशासाठी लाजीरवाणी घटना राजस्थानच्या चुरू (Churu, Rajasthan) जिल्ह्यात घडली आहे. चुरु जिल्ह्यात एका दलित व्यक्तीचं अपहरण करून, अमानुष अत्याचार केल्याची घटना समोर आली आहे. विशेष म्हणजे प्रजासत्ताकदिनी ही घटना घडली.

राजस्थानच्या चुरू जिल्ह्यात घडलेल्या या घटनेत काही लोकांनी एका दलित व्यक्तीचं अपहरण करून, त्याला बेदम मारहाण केली. आरोपी एवढ्यावरच थांबले नाहीत, तर त्यांनी त्याला लघवी पिण्यास भाग पाडलं. एकूणच या घटनेतील पीडित व्यक्तीवर गंभीर अत्याचार करण्यात आल्याचं या घटनेतून समोर आलं आहे. या प्रकरणी पोलिसांनी दोघांना अटक केली असून, इतर आरोपींनाही लवकरच अटक करण्यात येईल अशी माहिती चुरू जिल्ह्याचे अतिरिक्त जगदीश प्रसाद बोहरा यांनी दिली आहे.

घटनेतील पीडित व्यक्तीने आरोपींनी आपल्याला जातीयवादी शिवीगाळ केल्याचे आरोप केले आहेत. तसंच पिडित व्यक्तिच्या पाठीवरील जखमा पाहता, त्याला मारहाण झाल्याचं दिसून येत असल्याचं पोलिसांनी सांगितलं आहे.