आंतरधर्मीय विवाह केलेल्या जोडप्यांना दिल्ली सरकार पुरवणार सुरक्षितता; SOP जाहीर

नवी दिल्ली : दिल्ली सरकारने आंतरजातीय तसेच आंतरधर्मीय विवाह केलेल्या जोडप्यांना होणाऱ्या त्रासापासून आणि धमक्यांपासून वाचवण्यासाठी Standard Operating Procedure (SOP) जाहीर केले आहेत. तसेच अशा प्रकरणांच्या संरक्षणासाठी पोलिस उपायुक्तांच्या नेतृत्वाखाली एक स्पेशल सेलची स्थापना करण्याचे आदेश दिले आहेत. या SOP नुसार, ज्या जोडप्यांना त्यांच्या नातेवाईकांकडून, स्थानिक समुदायाकडून अथवा जात पंचायतींकडून त्रास दिला जात आहे, त्यांना सरकार आपल्या 'सेफ हाऊस' अर्थात सुरक्षित गृहांमध्ये रहायला जागा देईल. 

हेही वाचा - भाजप महिला नेत्यावर हल्ला; चेहऱ्यावर रासायनिक रंग फेकल्याने तब्येत बिघडली

टोल फ्री नंबर जाहीर
अशा जोडप्यांच्या मदतीसाठी 24 तास सेवा देणाऱ्या टोल फ्री नंबरची सुविधा प्रदान करण्यात आली आहे. सरकारने म्हटलंय की, दिल्ली महिला आयोगाच्या सध्याच्या टोल फ्री महिला हेल्पलाईन 181 वरच आंतरजातीय आणि आंतरधर्मीय विवाह केलेले जोडपे त्रासाबद्दल अथवा धमकींबद्दल तक्रार दाखल करु शकतात. त्यांना नक्कीच इथून मदत मिळू शकेल. समाज कल्याण विभागाकडून जाहीर केलेल्या SOP मध्ये म्हटलंय की, टेलीकॉलरला आपला त्रास आणि तक्रार सांगणाऱ्या जोडप्यांना विनासायास मदत मिळावी यासाठी प्रशिक्षित व्यक्तींची नियुक्ती केली गेली आहे. त्यांना आवश्यक ती मदत अथवा सल्ला दिला जाईल. यामध्ये पुढे म्हटलंय की, अशा जोडप्यांच्या व्यथा ऐकल्यानंतर संबंधित भागातील पोलिस उपायुक्त या प्रकरणात लक्ष घालतील. तसेच ते जिल्हाधिकाऱ्यांच्या मदतीने सुरक्षित घरांमध्ये राहण्यासाठी त्यांची मदत केली जाईल. या गेल्या आठवड्याच्या सुरवातीलाच, आंतरजातीय विवाह केल्यामुळे दक्षिण-पूर्व दिल्लीच्या हरिजन वस्तीमध्ये हिंसा भडकली होती. दिल्ली पोलिसांनी या घटनेसंदर्भात अनेक लोकांना अटक केली आहे. 

हेही वाचा - रेकॉर्ड ब्रेक वाढ! यंदाच्या वर्षात एका दिवसातील सर्वाधिक रुग्णांची नोंद

जोडप्यांना पुरवली जाईल सुरक्षितता
अशा जोडप्यांना आवश्यक ती सुरक्षा पुरवली जाईल. तसेच 'सुरक्षित गृहांची' त्यांना गरज असल्यास ती व्यवस्था देखील त्यांना पुरवली जाईल. अशा जोडप्यांच्या मदतीसाठी संबंधित भागातील उपायुक्त त्यांच्यासाठी उपलब्ध असतील, असं यामध्ये सांगण्यात आलं आहे.