समलिंगी विवाहाला कायदेशीर मान्यतेसाठी दिल्ली HC मध्ये याचिका, सुनावणी सुरू

नवी दिल्ली : हिंदू विवाह कायदा (hindu marriage act), विशेष विवाह कायदा आणि विदेशी विवाह कायद्याअंतर्गत समलिंगी विवाहाला (same sex marriage) मान्यता आणि नोंदणीची मागणी करणाऱ्या अनेक याचिका दिल्ली उच्च न्यायालयात (Delhi high court) दाखल आहेत. आज या याचिकांवर दिल्ली उच्च न्यायालयात सुनावणी घेण्यात येत आहे.

आपल्या देशात अनेक समलिंगी जोडपे आहेत. मात्र, लग्नासाठी समाजासोबतच त्यांना कायदेशीर मान्यतेची गरज असते. पण, देशात समलिंगी विवाहांना कायदेशीर मान्यता नसल्याने अनेक समलिंगी जोडपे विदेशात जाऊन लग्न करतात आणि तिथेच विवाहासाठी नोंदणी करतात. या विवाहासाठी कायदेशारी मान्यता मिळावी, अशी मागणी करणाऱ्या याचिका दिल्ली उच्च न्यायालयात दाखल आहेत. गेल्या सप्टेंबर महिन्यात यावर सुनावणी घेण्यात आली होती. त्यावेळी केंद्र सरकारने दिल्ली उच्च न्यायालयात दाखल केलेल्या प्रतिज्ञापत्रात याबाबत प्रतिकूल मत नोंदवलं होतं.

'आपल्या देशातील संसदेने तयार केलेले कायदे पुरुष आणि स्त्रीमध्ये झालेल्या विवाहालाच मान्यता देतात. वेगवेगळ्या धार्मिक समुदायांचे रितीरिवाज, संस्कृती आणि त्यांच्या पारंपरिक कायद्यांचा त्यात समावेश आहे. त्यात कुठल्याही प्रकारच्या हस्तक्षेपामुळे देशातील या कायद्यांचं संतुलन बिघडण्याची शक्यता आहे. तसेच त्यावरून अनागोंदी निर्माण होईल,' असं मत केंद्र सरकारने उच्च न्यायालयात मांडलं होतं.

दरम्यान, आज या याचिकांवर सुनावणी होत आहे. त्यामुळे दिल्ली उच्च न्यायालयाचा या याचिकांवर काय निर्णय येतो हे पाहणे महत्वाचे ठरणार आहे.