आर्यन खान प्रकरण : प्रभाकर साईलच्या गंभीर आरोपानंतर NCB चं स्पष्टीकरण

मुंबई : आर्यन खान ड्रग्स प्रकरणातील (aryan khan drugs case) पंच प्रभाकर साईलने एक व्हिडिओ आणि अॅफीडेविटमधून एनसीबीचे अधिकारी समीर वानखेडे (ncb officer samir wankhede) यांच्यावर गंभीर आरोप केले आहेत. २५ कोटींची डील करून हे प्रकरण दाबण्याचा प्रयत्न करण्यात आला, असा खळबळजनक आरोप त्याने केला आहे. त्यानंतर आता एनसीबीचे अधिकारी अशोक जैन यांनी याबाबत स्पष्टीकरण दिलं आहे.

आर्यन खान ड्रग्स प्रकरणातील पंच प्रभाकर साईलचे अॅफिडेविट मी पाहिले आहे. पण, ते सर्व आरोप आमच्या एनसीबीचे अधिकारी समीर वानखेडे यांनी फेटाळले आहेत. तो या प्रकरणात पंच असल्यामुळे त्याने न्यायालयात आपले म्हणणे मांडायला पाहिजे होते. असे आरोप सोशल मीडिया आणि मीडियाच्या माध्यमातून करू नये. सध्या प्रकरण न्यायालयात आहे. त्यामुळे प्रभाकर साईलने सोशल मीडियावरून अशी प्रतिक्रिया देऊ नये. हे अॅफिडेविट एनसीबीच्यी वरिष्ठ अधिकाऱ्यांकडे पाठविले असून त्यावर योग्य ती कारवाई करण्यात येईल, असेही अशोक जैन यांनी प्रेस नोटमध्ये म्हटले आहे.

प्रभाकर साईलने नेमके काय आरोप केलेत? -

क्रूझवर झालेल्या छापेमारीवेळी प्रभाकर साईल किरण गोसावीसोबत होता. सॅम नावाच्या व्यक्तीला आणि गोसावीला एनसीबी कार्यालयाजवळ भेटताना त्याने पाहिले. ''आर्यनला ताब्यात घेतल्यानंतर शाहरुखची मॅनेजर पूजाला हे दोघे भेटले. त्यांच्यामध्ये निळ्या मर्सिडीज कारमध्ये बोलणे झाले. हे प्रकरण दाबण्यासाठी हे बोलणं सुरू होते. २५ कोटींमध्ये ही डील झाली होती. त्यानुसार ८ कोटी समीर वानखेडे सरांना द्यायचे आहेत आणि उरलेले आपल्याला वाटून घ्यायचे आहेत, असे किरण गोसावी फोनवरून कोणासोबत तरी बोलला होता. तसेच एनसीबीने मला खोट्या पंचनाम्यावर सही करायला लावली'' असे गंभीर आरोप या व्हिडिओमध्ये करण्यात आले आहेत.

समीर वानखेडेंची प्रतिक्रिया काय? -

प्रभाकर साईलने केलेल्या गंभीर आरोपानंतर समीर वानखेडे यांनी एका माध्यमासोबत बोलताना प्रतिक्रिया दिली. ''प्रभाकर साईलच्या आरोपांना योग्य वेळी उत्तर देईन'' असे ते म्हणाले.