आम आदमी पक्षाच्या नेत्यांना डबल शिक्षा द्या : केजरीवाल

नवी दिल्ली : सीएए विरोधात दिल्लीत आंदोलनाचा भडका उडाला असून ही आग भडकवण्यामागे दिल्लीतील काही स्थानिक राजकीय नेत्यांचाही हात असल्याचे समोर आले आहे. हिंसाचारात सामील असलेले लोक आम आदमी पक्षाचे असल्याचे असतील, तर त्यांना दुप्पट शिक्षा द्या, असे मुख्यमंत्री अरविंद केजरीवाल यांनी म्हटले आहे.

ताज्या बातम्यांसाठी डाऊनलोड करा ई-सकाळचे ऍप

कुठल्याही पक्षाचा नेता असूद्या, दोषी आढळल्यास त्याला कडक शिक्षा करण्याची मागणी त्यांनी यावेळी केली. परंतु, जर तो नेता आपचा असेल तर त्याला डबल शिक्षा द्या असेही केजरीवाल यांनी यावेळी म्हटले. आपचे नगरसेवक ताहिर हुसेन यांचा दंगलींमध्ये सहभाग असल्याबाबत विचारणा केली असता; दंगल करणारी व्यक्ती कोणत्याही पक्षाची असो, तिची गय केली जायला नको, असे ते म्हणाले.

जीव गमावलेल्यांच्या कुटुंबीयांना दिल्ली सरकार १० लाख रुपये सानुग्रह अनुदान देईल, असे केजरीवाल यांनी पत्रकार परिषदेत जाहीर केले. गंभीर जखमींना २ लाख रुपये देण्यात येतील. या हिंसाचारात जखमी झालेल्या आणि खासगी रुग्णालयात दाखल करण्यात आलेल्यांच्या उपचाराचा खर्च सरकार सोसेल. जाळपोळीत ज्यांनी महत्त्वाची कागदपत्रे गमावली, त्यांना ती परत मिळण्यासाठी विशेष शिबिरे आयोजित केली जातील अशीही माहिती केजरीवाल यांनी दिली.