मेंदूज्वरामुळे बिहारमध्ये 97 मुले दगावली

नवी दिल्ली : बिहार राज्यात उष्णतेच्या लाटेने थैमान घातले असताना आता मेंदूज्वरामुळे भीषण परिस्थिती निर्माण झाली आहे. आत्तापर्यंत मेंदूज्वर (एन्सेफलायटीस) मुळे सुमारे 97 मुले दगावली असून 146 मुलांवर उपचार सुरू असल्याची माहिती मुजफ्फरपूर जिल्ह्यातील वैद्यकीय अधिकारी शैलेश प्रसाद सिंह दिली आहे. 

"रुग्णालयात चांगल्या सुविधा मिळत नाहीत. जर चांगल्या सुविधा मिळाल्या असत्या, तर दगावलेली लहान मुले वाचू शकली असती,'' असे एका रुग्णाच्या नातेवाईकांनी म्हटले आहे. तर आजारी मुलांवर शक्य तेवढे उपचार केले जात असल्याचे सरकारी अधिकाऱ्यांचे म्हणणे आहे. 

मेंदूज्वरामुळे मेंदूला सूज येते, ज्यामुळे रुग्णाला बऱ्याच गोष्टींना सामोरे जावे लागते. ताप येणे, उलट्या होणे, झटका येणे, पक्षाघात आणि कोमा ही लक्षणे मेंदूज्वर झाल्याचे दर्शवितात. शिशु आणि वृद्ध लोकांना मेंदूज्वर होण्याचे प्रमाण जास्त आहे. पाच वर्षांपूर्वीही बिहारमध्ये 380 जणांचा मृत्यू झाला होता.