फराक्का एक्‍स्प्रेसचे डबे घसरून 5 ठार 

लखनौ/नवी दिल्ली (पीटीआय) : नवी दिल्लीच्या दिशेने जाणाऱ्या न्यू फराक्का एक्‍स्प्रेसचे डबे आज रायबरेलीजवळ घसरून झालेल्या अपघातात पाच जण ठार झाले, तर अन्य नऊ जण गंभीर जखमी झाले आहेत. आज सकाळी सहाच्या सुमारास हा अपघात घडला. ही गाडी पश्‍चिम बंगालमधील माल्डाहून नवी दिल्लीच्या दिशेने चालली होती. या अपघातामध्ये 30 ते 35 लोक किरकोळ जखमी झाल्याचे समजते. 

या अपघातातील जखमींवर लखनौमधील रुग्णालयात उपचार सुरू असून, अन्य काही जखमींना रायबरेलीला हलविण्यात आले आहेत. दरम्यान या अपघातानंतर रेल्वे वाहतूक पूर्णपणे कोलमडली होती. काही प्रवाशांना सुरक्षितस्थळी नेण्यासाठी प्रशासनाकडून खासगी गाड्यांबरोबर पर्याय रेल्वेची सोय करण्यात आली होती. रेल्वे स्थानकावर अडकून पडलेल्या प्रवाशांना स्थानिक प्रशासनाकडून नाश्‍ताही देण्यात आला. दरम्यान या अपघातावर पंतप्रधान नरेंद्र मोदी यांनी शोक व्यक्त केला असून, रेल्वेमंत्री पीयूष गोयल यांनी मृतांच्या नातेवाइकांना पाच लाख रुपये, जखमींना 1 लाख रुपये आणि किरकोळ जखमींना 50 हजारांची मदत जाहीर केली आहे. उत्तर प्रदेशचे मुख्यमंत्री योगी आदित्यनाथ यांनीही मृतांच्या नातेवाइकांना राज्य सरकारकडून 2 लाख आणि गंभीर जखमींना 50 हजारांची मदत जाहीर केली.