INS Vikramaditya : नौदलाची विमानवाहू युद्धनौका INS विक्रमादित्य जहाजाला लागली आग

नवी दिल्ली : भारतीय नौदलाच्या आयएनएस विक्रमादित्य (INS Vikramaditya) या विमानवाहू जहाजाला (Ship) बुधवारी आग लागली. यानंतर लगेचच तिथं उपस्थित असलेल्या टीमनं बचावकार्य सुरू केलं. त्यामुळं आग काही वेळातच आटोक्यात आली. सध्या या घटनेत कोणीही जखमी झालं नसून युद्धनौकाही पूर्णपणे सुरक्षित आहे. या प्रकरणाचं गांभीर्य लक्षात घेऊन नौदलानं कोर्ट ऑफ इन्क्वायरीची स्थापना केलीय, जी संपूर्ण प्रकरणाची चौकशी करेल.

नौदलाच्या प्रवक्त्यानं ट्विट केलं की, युद्धनौका कर्नाटकातील कारवार (Karnataka Karwar) येथून सागरी कारवाईसाठी निघालीय. दरम्यान, बुधवारी त्यात आग लागल्याची माहिती समोर आली. पथकानं घटनेनंतर लगेचच जहाजाच्या अग्निशमन यंत्रणेचा (Fire Brigade) वापर करून आग नियंत्रणात आणली. त्यामुळं तिथं उपस्थित असलेल्या एकाही नौसैनिकाला दुखापत झाली नाही. दुसऱ्या ट्विटमध्ये प्रवक्त्यानं लिहिलंय की, 'यासाठी चौकशी मंडळ स्थापन करण्यात आलं आहे. त्याचा अहवाल आल्यानंतरच अपघाताचं कारण समजू शकेल.'

याआधी 8 मे 2021 रोजी आयएनएस विक्रमादित्यवर अशीच घटना घडली होती. त्यावेळीही आग वेळीच आटोक्यात आणली गेली. INS विक्रमादित्य ही भारताची एकमेव विमानवाहू युद्धनौका आहे, जी भारतानं रशियाकडून 14 हजार कोटींना खरेदी केली होती. हे 20 मजली जहाज 284 मीटर लांब आणि 60 मीटर उंच आहे. त्याचं वजन 40 हजार टनांपेक्षा जास्त आहे. एका वेळी सुमारे 1600 सैनिक त्यावर तैनात असतात.