शिक्षेविरोधात लालूंची उच्च न्यायालयात धाव

रांची - चारा गैरव्यवहारप्रकरणी केंद्रीय अन्वेषण विभागाच्या (सीबीआय) न्यायालयाने ठोठावलेल्या शिक्षेच्या विरोधात लवकरच झारखंड उच्च न्यायालयात अपील करण्यात येणार असल्याची माहिती राष्ट्रीय जनता दलाचे सर्वेसर्वा लालूप्रसाद यादव यांच्या वकिलाने आज दिली.

चारा गैरव्यवहारप्रकरणी यादव यांना "सीबीआय'च्या न्यायालयाने साडेतीन वर्षांच्या तुरुंगवासाची शिक्षा ठोठावली आहे. "सीबीआय' न्यायालयाच्या या निकालाच्या विरोधात झारखंड उच्च न्यायालयात अपील करण्यात येणार असल्याचे यादव यांचे वकील प्रभातकुमार यांनी "पीटीआय'शी बोलताना सांगितले. शुक्रवारी किंवा पुढील सोमवारी अपिलासाठी उच्च न्यायालयात अर्ज करण्यात येईल, असेही ते म्हणाले.
यादव यांच्या बहिणीचे रविवारी (ता. 7) निधन झाले असून, त्या पार्श्वभूमीवर यादव हे पॅरोलसाठी अर्ज करणार का? असा प्रश्न पत्रकारांनी प्रभातकुमार यांना विचारला होता. त्यावर अशा प्रकारचा कुठलाही विचार नाही, असे उत्तर त्यांनी दिले. 

चारा गैरव्यवहारप्रकरणी यादव यांना यापूर्वीही न्यायालयाने दोषी ठरवत शिक्षा ठोठावली होती.