लष्करातील माजी कर्मचाऱ्याची पत्नीसह धावत्या ट्रेनसमोर उडी

हैदराबाद : लष्कराच्या माजी कर्मचाऱ्याने पत्नीसह धावत्या ट्रेनसमोर उडी घेत आत्महत्या (Suicide) केली. ही घटना तेलंगणात घडली असून सिकंदराबामधील (Secunderabad Telangana) बोलारम येथे या जोडप्याचे मृतदेह छिन्नविछिन्न अवस्थेत रेल्वे रुळांवर पडले होते. दोघांच्या आत्महत्येमुळे परिसरात हळहळ व्यक्त केली जात आहे.

वाय कोंडय्या (५५) आणि त्यांची पत्नी भूलक्ष्मी असे आत्महत्या केलेल्यांची नावे आहेत. दोघेही सिकंदराबादमध्ये राहत होते. वाय कोंडय्या यांनी सैन्यात लिपिक म्हणून काम केले आहे. काही दिवसांपूर्वी ते निवृत्त झाले. सोमवारी ३१ जानेवारीला हे जोडपं बाहेर जातो, असं मुलीला सांगून निघून गेले. पण, घरी परतलेच नाहीत. त्यामुळे त्यांच्या मुलीने बेपत्ता झाल्याची तक्रार पोलिसांत दिली. मंगळवारी सकाळीच रेल्वे पोलिसांना सिकंदराबादमधील बोलारमजवळ रेल्वे रुळावर दोघांचे मृतदेह छिन्नविछिन्न अवस्थेत पडललेले दिसले. त्यानंतर त्यांनी संबंधित पोलिस ठाण्याला माहिती दिली. पोलिसांनी घटनास्थळी पोहोचत पंचनामा केला. तसेच गुन्हा दाखल करून मृतदेह गांधी रुग्णालयात शवविच्छेदनासाठी पाठवले. याप्रकरणी अधिक तपास सिकंदराबाद पोलिस करत आहे.

आत्महत्येचं कारण नेमकं काय? -

मुलीच्या वडिलांवर कर्जाचा डोंगर होता. आर्थिक टंचाईमुळे ते चिंतेत होते. तसेच ते नैराश्यामध्ये देखील गेले होते. त्यामुळे त्यांनी आत्महत्या केली असावी, असा अंदाज मुलीनं व्यक्त केला आहे.