'आप' जिंकल्यास पंजाबला मोफत वीज; केजरीवालांचं आश्वासन

नवी दिल्ली : येत्या काही महिन्यातच पंजाब विधानसभेच्या निवडणुका येऊ घातल्या आहेत. या निवडणुकीच्या पार्श्वभूमीवर आतापासूनच राजकीय पक्षांनी आपली कंबर कसली आहे. पंजाबच्या या निवडणुकीमध्ये आपलं नशीब आजमावण्यासाठी अरविंद केजरीवाल यांची 'आम आदमी पार्टी' पुढे सरसावली आहे. केजरीवाल यांनी नुकतेच पंजाबमध्ये सगळ्या जागा लढवणार असल्याची घोषणा केली होती. याच धर्तीवर आता त्यांनी पुढची घोषणा केली आहे. दिल्लीत यशस्वी ठरलेला मोफत वीजेचे वचन आम आदमी पक्षाचे (आप) राष्ट्रीय निमंत्रक अरविंद केजरीवाल यांनी पंजाबसाठीही लागू केले. पुढील वर्षी विधानसभा निवडणुकीत आपची सरशी झाल्यास पंजाबला मोफत वीज देऊ असे त्यांनी ट्विटरवरून जाहीर केले.

दिल्लीचे मुख्यमंत्री केजरीवाल उद्या चंडीगडला भेट देणार आहेत. त्यांनी पंजाबीत ट्विट केले आहे. त्यांनी महागाईमुळे पंजाबमधील महिलांनी आनंद गमावल्याचा दावा केला. त्यांनी म्हटले आहे की, दिल्लीत आम्ही प्रत्येक कुटुंबाला दोनशे युनिट वीज मोफत देतो. त्यामुळे महिला आनंदात आहेत. आपचे सरकार आल्यास ते पंजाबमध्ये वीज मोफत पुरवेल. उद्या तुमची भेट घेण्यास मी आतुर आहे.

दरम्यान, आपचे प्रवक्ते आणि दिल्लीचे आमदार राघव चढ्ढा यांनी पंजाबच्या मुख्यमंत्री कार्यालयावर टीका केली. पूर्वनिश्चित ठिकाणी पत्रकार परिषद घेण्याची परवानगी आपला नाकारण्यात आल्याचा आरोप त्यांनी केला, मात्र मंगळवारी केजरीवाल चंडीगडमध्ये भव्य घोषणा करतील. त्यामुळे कॅप्टन (पंजाबचे मुख्यमंत्री अमरिंदर सिंग) आणि त्यांच्या पक्षाला ४४० व्होल्टचा झटका बसेल, असे ट्विट त्यांनी केले.