‘जी-२३’ गटाच्या नेत्यांची आपल्या बैठकीनंतर सोनियांशी भेट; 'अशी' झाली चर्चा

नवी दिल्ली : सामूहिक नेतृत्वाची मागणी करणाऱ्या असंतुष्ट नेत्यांच्या जी-२३ गटाला चुचकारण्याचा प्रयत्न काँग्रेस अध्यक्षा सोनिया गांधींकडून सुरू आहे. याअंतर्गत आज या गटाचे नेते आणि राज्यसभेतील काँग्रेसचे उपनेते मनीष तिवारी, विवेक तनखा तर लोकसभेतील खासदार मनीष तिवारी आज सोनिया गांधींना भेटले. (Sonia Gandhi)

काँग्रेस कार्यकारिणीतील सदस्यांची निवडणूक व्हावी, निवडणूक समिती आणि संसदीय मंडळ तयार केले जावे, जेणेकरून पक्षातील महत्त्वाचे निर्णय एकतर्फी पद्धतीने होण्याऐवजी सर्वांच्या सल्लामसलतीनंतरच व्हावेत, असा आग्रह धरणाऱ्या जी-२३ गटाच्या नेत्यांची गुलाम नबी आझाद यांच्या निवासस्थान झालेली प्रदीर्घ बैठक, त्यानंतर हरियानाचे मुख्यमंत्री भूपिंदर हुडा यांची राहुल गांधींसमवेत झालेली बैठक आणि गुलाम नबी आझाद आणि सोनिया गांधी यांची झालेली बहुचर्चित भेट, या पार्श्वभूमीवर आजची भेट महत्त्वाची मानली जात आहे. जी-२३ गटाचे बंड शांत करण्यासाठी काँग्रेस नेतृत्वाने या गटातील नेत्यांना कार्यकारिणीमध्ये तसेच संसदीय मंडळामध्ये सामावून घेण्याची तयारी चालविल्याचे समजते. त्या प्रक्रियेअंतर्गत सुरू झालेल्या सल्लामसलतीचा भाग म्हणून ही भेट असल्याचे सांगितले जाते. (Sonia Gandhi)

राहुल गटावर नाराजी
पाच राज्यांच्या विधानसभा निवडणुकीतील काँग्रेसच्या पराभवानंतर पक्ष नेतृत्वावर, विशेषतः राहुल गांधींच्या कार्यपद्धतीविरोधात असंतुष्ट नेत्यांनी आक्रमक पवित्रा घेतला आहे. राहुल यांचे विश्वासू अजय माकन, के. सी. वेणुगोवाल, रणदीप सुरजेवाला हेदेखील जी-२३ गटाच्या नाराजीचे कारण बनले आहेत. जी-२३ गटाने पक्षामध्ये सर्वसमावेशक तसेच सामुहिक नेतृत्वाची मागणी सुरू केली आहे. राज्याच्या निवडणुकांमध्ये मुख्यमंत्रिपदाचा चेहरा जाहीर करताना सामूहिक निर्णय व्हावा, समविचारी पक्षांशी आघाडी करण्याच्या धोरणात्मक प्रक्रियेमध्ये वरिष्ठ नेत्यांचा सहभाग असलेली यंत्रणा तयार केली जावी, अशीही मागणी या गटाची आहे. (Sonia Gandhi)