G20 Summit: PM मोदींनी केली G20 शिखर परिषदेच्या समाप्तीची घोषणा; ब्राझीलकडे सोपवलं अध्यक्षपद

नवी दिल्ली - G20 Summit 2023 : G20 शिखर परिषद दिल्लीत आज संपन्न झाली. 9 सप्टेंबरपासून सुरू झालेल्या दोन दिवसीय G20 शिखर परिषदेचा समारोप घोषित करताना, PM मोदींनी G20 परिषदेचे अध्यक्षपद ब्राझीलच्या राष्ट्रपतींना सुपूर्द केले.

यावेळी पंतप्रधान मोदी म्हणाले की, नोव्हेंबरपर्यंत G20 चे अध्यक्षपद भारताकडे आहे. नोव्हेंबरच्या अखेरीस आम्ही G20 चे दुसरे व्हर्च्युअल सत्र आयोजित करण्याचा माझा प्रस्ताव आहे. यामध्ये या शिखर परिषदेदरम्यान ठरलेल्या विषयांचा आढावा घेता येईल.

त्याचवेळी, ब्राझीलचे राष्ट्रपती म्हणाले की, G20 परिषदेचे कार्यक्षमतेने नेतृत्व केल्याबद्दल आणि या शिखर परिषदेत उत्कृष्ट काम केल्याबद्दल मी पंतप्रधान मोदींचे अभिनंदन करतो. पंतप्रधान मोदी आज ब्राझीलचे राष्ट्रपती लुला दा सिल्वा यांच्याशी द्विपक्षीय चर्चा करणार आहेत. नायजेरियाचे राष्ट्राध्यक्ष आणि तुर्कीचे राष्ट्राध्यक्ष एर्दोगान यांच्याशीही पंतप्रधान द्विपक्षीय चर्चा करतील.

याशिवाय पंतप्रधान मोदी आज भारताचे महत्त्वाचे भागीदार देश UAE आणि दक्षिण कोरिया यांच्याशी द्विपक्षीय चर्चा करणार आहेत. पंतप्रधान जी-20 चे महत्त्वाचे सदस्य असलेल्या युरोपियन युनियनच्या नेत्यांशीही द्विपक्षीय चर्चा करणार आहेत.