Ajmer : सामूहिक बलात्कारानंतर तरुणीला हॉटेलमध्ये बेदम मारहाण; आरोपीनं रुग्णालयात नेलं अन्..

राजस्थानमधील अजमेर जिल्ह्यात (Ajmer Rajasthan) एका मुलीवर सामूहिक बलात्कार झाल्याची घटना समोर आलीय. सामूहिक बलात्कारानंतर आरोपींनी मुलीला बेदम मारहाण केलीय. त्याचवेळी रुग्णालयात (Hospital) उपचारादरम्यान बुधवारी पीडित मुलीचा मृत्यू झाला.

पोलिसांनी या घटनेतील मुख्य आरोपींना अटक केलीय. तर, इतरांचा शोध घेण्यासाठी छापे टाकले जात आहेत. मिळालेल्या माहितीनुसार, ही घटना जिल्ह्यातील क्लॉक टॉवर पोलीस ठाण्याच्या हद्दीतील आहे. इथं 28 ऑक्टोबरला पीडितेच्या वडिलांनी पोलीस ठाण्यात गुन्हा दाखल केला होता. वडिलांनी दिलेल्या तक्रारीत म्हटलंय की, 27 ऑक्टोबर रोजी कुख्यात गुन्हेगार श्यामलाल डांगोरिया उर्फ ​​श्यामा यानं रात्री 10 वाजण्याच्या सुमारास त्यांच्या मुलीचं अपहरण केलं आणि नंतर साथीदारांसह हॉटेलमध्ये तिच्यावर सामूहिक बलात्कार केला.

त्याचवेळी मुलीच्या मृत्यूनंतर संतप्त नागरिकांचा जमाव रुग्णालयासमोर जमा झाला आणि त्यांनी जोरदार निदर्शनं केली. पोलिसांनी इतर आरोपींना तत्काळ अटक करण्याची मागणी लोकांनी केली. सामूहिक बलात्कार आणि मारहाणीनंतर आरोपीनं दुसऱ्या दिवशी पीडित मुलीला गंभीर अवस्थेत रुग्णालयात नेल्यानंतर तेथून पळून गेल्याचं सांगण्यात येत आहे. यानंतर मुलीच्या कुटुंबीयांनी जवाहरलाल नेहरू हॉस्पिटल गाठलं.

मुलीला बेदम मारहाण करण्यात आली असून तिच्या शरीरावर अनेक ठिकाणी जखमेच्या खुणा आढळल्याचा आरोप नातेवाईकांनी केलाय. नातेवाइकांच्या तक्रारीवरून पोलिसांनी अपहरण, प्राणघातक हल्ला आणि खुनाचा प्रयत्न केल्याचा गुन्हा दाखल केला आहे. दरम्यान, या घटनेनंतर पोलिसांनी या घटनेतील मुख्य आरोपींना अटक केली असून इतरांचा शोध सुरू आहे.