Liquor News: आता दारुच्या प्रत्येक बाटलीवर दहा रुपये गोमाता अधिभार; काय आहे सरकारचा निर्णय?

Himachal Pradesh : हिमाचल प्रदेशमध्ये राज्य सरकारने एक मोठा निर्णय घेतला आहे. या निर्णयान्वये दारुच्या प्रत्येक बाटलीवर सर्वांना अधिभार सोसावा लागेल. शुक्रवारी हिमाचल प्रदेशचा अर्थसंकल्प सादर करण्यात आला, त्यामध्ये याबाबत घोषणा करण्यात आली.

हिमाचल प्रदेशमध्ये दारुवर जो १० रुपये अधिभार लावण्यात येणार आहे तो गोमाता अधिभार या नावाने आकारला जाईल. हिमाचल प्रदेशचे मुख्यमंत्री सुखविंदर सुक्खू यांनी आज राज्याचा अर्थसंकल्प सादर केला, यामध्ये ही घोषणा करण्यात आलेली आहे.

हेही वाचाः ही चाळीस वर्षे जुनी बलाढ्य बँक ४८ तासात बुडालीच कशी?

हिमाचल प्रदेश सरकारच्या या दारुसंबंधी निर्णयामुळे सरकारला वर्षाकाठी शंभर कोटी रुपयांचा महसूल मिळेल. महसूलवाढीसाठी सरकारने हा निर्णय घेतल्याचं सांगण्यात येत आहे.

सुक्खू यांनी आज पहिला अर्थसंकल्प सादर केला. या निर्णयामुळे राज्याला नवी दिशा मिळेल, असं ते म्हणाले.

आज सादर करण्यात आलेल्या अर्थसंकल्पामध्ये बेरोजगारांना व्यवसायासाठी ४० टक्के सबसिडी देण्याचा निर्णय घेण्यात आला. तसेच ३० हजार कार्यात्मक पदे भरण्याचा निर्णय जाहीर करण्यात आला.

यासह अंगणवाडी सेविकेला ९ हजार ५०० रुपये मानधन, अंगणवाडी मदतनीस आणि आशा सेविकांनी ५ हजार २०० मानधन, आमदारांचा निधी २ कोटींवरुन २.१० कोटी करण्यात आला.

रोजगार हमी योजनेच्या मजुरांच्या मजुरीमध्ये २५ रुपयांनी वाढ करण्यात आलेली असून ३७५ रुपये मजुरी मिळेल.

मुलींना उच्च शिक्षणासाठी इलेक्ट्रिक स्कूटी खरेदीसाठी २५ हजार रुपये अनुदान देण्याचा निर्णय सरकारने घेतला.

हिमाचल प्रदेशमधील २० हजार मुली याचा लाभ घेऊ शकतील. तसेच चार्जिंग स्टेशनसाठी ५० टक्के अनुदान देण्याचा निर्णय राज्य सरकारने घेतला आहे.