Congress: मला माझं घर सोडण्यास प्रवृत्त करण्यात आलं - गुलाम नबी आझाद

काँग्रेसचे ज्येष्ठ नेते गुलाम नबी आझाद यांनी नुकताच काँग्रेसच्या पक्ष सदस्यत्वाचा राजीनामा दिला आहे. यामुळे काँग्रेसला मोठा धक्का बसल्याचं सांगितलं जात आहे. आता आझाद यांनी स्वतःच पक्ष सोडण्यामागची भूमिका स्पष्ट केली आहे. मोदी हे फक्त एक कारण आहे, असं सांगत पक्षाबद्दलची नाराजी व्यक्त केली आहे. (Gulam nabi Azad on resignation from congress)

मोदी फक्त कारण आहे. G23 नेत्यांचं पत्र लिहिल्यापासून त्यांना माझ्याविषयी अढी होती. त्यांच्यावर कोणी प्रश्न उपस्थित करेल हे त्यांना मान्य नव्हतं. काँग्रेसच्या काही बैठकाही झाल्या. पण कोणताही सल्ला स्विकारला गेला नाही. मला माझं घर सोडण्यापासून प्रवृत्त करण्यात आलं, अशी प्रतिक्रिया काँग्रेस नेते गुलाम नबी आझाद यांनी दिली आहे.

गेल्या काही दिवसांपासून गुलाम नबी आझाद यांनी पक्षाच्या निर्णयाबद्दल अनेकदा नाराजी व्यक्त केली होती. या आधीच १६ ऑगस्ट रोजी त्यांनी जम्मू काश्मीरच्या प्रचार प्रमुख पदाचा राजीनामाही दिला होता. नियुक्तीच्या अवघ्या काही तासांमध्येच त्यांनी हा राजीनामा दिला होता.