गुलाम नबी आझाद 20 दिवसांत करणार नवा पक्ष स्थापन; माजी मंत्र्यांची माहिती

जम्मू : काँग्रेसचे माजी नेते गुलाम नबी आझाद येत्या 20 दिवसांत राष्ट्रीय राजकीय पक्षाची स्थापन करतील आणि जम्मू-काश्मीरसाठी येणाऱ्या निवडणुकांत मुख्यमंत्रीपदाचे उमेदवार असतील असं त्यांच्या निकटवर्तीय आणि माजी मंत्री जीएम सरोरी यांनी सांगितलं. ते काँग्रेसचे जेष्ठ नेते होते, २६ ऑगस्ट रोजी त्यांनी काँग्रेस पक्षाला सोडचिठ्ठी दिली.

(Gulam Nabi Azad New Political Party Updates)

गुलाम नबी आझाद यांनी पक्षाला सोडचिठ्ठी दिल्यानंतर त्यांच्या समर्थनार्थ जम्मू काश्मीरमधील पाच बड्या काँग्रेस नेत्यांनीही पक्षातील आपापल्य पदाचा राजीनामा दिला होता. गुलाम नबी आझाद भाजपमध्ये सामील होणार असल्याच्या चर्चा होत असताना आपण लवकरच नवा पक्ष स्थापन करणार असल्याचं त्यांनी घोषित केलं होतं.

गुलाम नबी आझादा यांच्या समर्थनार्थ जीएम सरूरी, हाजी अब्दुल रशीद, मोहम्मद अमीन भट्ट, गिलजार अहमद वानी आणि चौधरी मोहम्मद अकरम या पाच नेत्यांनी पक्षाला रामराम ठोकला होता. तर काँग्रेसमधील या गळतीनंतर तेलंगणामध्येही माजी खासदाराने आपल्या पदाचा राजीनामा दिला होता.

गेल्या काही दिवसांपासून गुलाम नबी आझाद अस्वस्थ होते. आझाद यांनीही पक्षाच्या निर्णयाबद्दल अनेकदा नाराजी व्यक्त केली होती. ही अस्वस्थता पक्षाच्या बैठकीतून, त्यांच्या विधानांवरुन आणि कृतीतूनही दिसून येत होती. ते कधीही मोठा निर्णय़ घेतील, अशी चर्चा सुरू होतीच. या आधीच १६ ऑगस्ट रोजी त्यांनी जम्मू काश्मीरच्या प्रचार प्रमुख पदाचा राजीनामाही दिला होता. नियुक्तीच्या अवघ्या काही तासांमध्येच त्यांनी हा राजीनामा दिला होता. त्यामुळे त्यांची नाराजी उघडकीस आली होती.