"केंद्रीय मंत्र्यांच्या रॅलीत हवेत गोळीबार; यावरून भाजपची..."

राष्ट्रवादीच्या नेत्याने घडलेल्या प्रकारावर केली बोचरी टीका

मुंबई: कर्नाटकच्या बिदर या शहरात भाजपच्या जन आशीर्वाद यात्रेची रॅली सुरू होती. त्यावेळी भाजप समर्थकांनी केंद्रीय मंत्री भगवंत खुबा यांच्या उपस्थितीत त्यांच्याच समोर हवेत गोळीबार केला. असा प्रकार घडणे म्हणजे भाजपने लोकशाही गुंडाळून टाकण्याचा प्रयत्न करण्यासारखे आहे. त्यामुळे अशा प्रकारांवरून अंदाज येतो की भविष्यात भाजपची पाऊले कुठल्या दिशेने जात आहेत, अशी बोचरी टीका राष्ट्रवादी काँग्रेसचे मुख्य राज्य प्रवक्ते महेश तपासे यांनी केली.

केंद्रीय मंत्र्यांच्या उपस्थितीत हवेत गोळीबार होतो ही बाब अत्यंत निंदनीय आहे. अशा प्रकारच्या नेतृत्वावरून एक गोष्ट स्पष्ट होते की भविष्यात आता भाजपची पाऊले कुठल्या तरी वेगळ्याच दिशेने पडतील यात दुमत नाही, असे महेश तपासे म्हणाले. त्यासोबत, ज्या केंद्रीय मंत्री भगवंत खुबा यांच्या उपस्थितीत हा प्रकार घडला, त्यांचा तत्काळ राजीनामा घेतला जायला हवा आणि त्यांची पंतप्रधान मोदी यांनी मंत्रीमंडळातून हकालपट्टी करायला हवी, अशी स्पष्ट मागणी देखील त्यांनी केली.

कर्नाटकमधील बिदर भागात भाजपच्या जन आशीर्वाद यात्रेत भाजप समर्थकांनी हवेत गोळीबार करत केंद्रीय मंत्री भगवंत खुबा यांचे जोरदार स्वागत केले. यामुळे सर्वसामान्य जनतेत दहशतीचे व भीतीचे वातावरण निर्माण झाले. भाजपच्या कार्यकर्त्यांकडे विना परवाना शस्त्रास्त्र होती. याचाच अर्थ भाजपचे लोक जनसामान्यांना घाबरवण्यासाठी याचा कधीही वापर करत असतील. त्यामुळे मोदी सरकारकडे थोडी जरी नैतिकता असेल तर अशा केंद्रीय मंत्र्यांवर तात्काळ कारवाई करावी. भाजपने नैतिकता म्हणून भगवंत खुबा यांचा राजीनामा घेतलाच पाहिजे. मंत्रीमंडळातून हकालपट्टी करावी, अशी मागणी महेश तपासे यांनी केली.