Himachal Pradesh Floor Test : भाजपचा आता नवा डाव? हिमाचलमध्ये केली विश्वासदर्शक ठरावाची मागणी; कारण...

नवी दिल्ली : देशात अनेक राज्यांमध्ये आमदार फोडाफोडीमुळं सत्ता बदल झाल्यानंतर भाजपनं आता नव्या डावाला सुरुवात केली आहे. हिमाचल प्रदेशातील काँग्रेस सरकारविरोधात विश्वास दर्शक ठरावाची मागणी भाजप राज्यपालांना भेटून केली आहे. भाजपनं असं करण्यामागं आता एक मोठं कारणही समोर आहे. (himachal pradesh floor test demaned by bjp to governer new strategy after debacle in many states)

भाजपचे वरिष्ठ नेते आणि विरोधीपक्ष नेते जयराम ठाकूर यांनी पक्षाचे आमदारांसह बुधवारी राज्यपाल शिवप्रताप शुक्ला यांनी राजभवनवर जाऊन भेट घेतली. सुत्रांच्या माहितीनुसार, भाजपनं राज्यपालांना भेटून हिमाचल प्रदेशच्या विधानसभेत विश्वासदर्शक ठराव घेण्याची मागणी केली आहे. मुख्यमंत्री सुखविंदर सिख्खू यांनी बहुमत गमावल्याचं सांगत त्यांनी ही मागणी केल्याचं सांगितलं जात आहे.

दरम्यान, मुख्यमंत्र्यांनी बहुमत गमावल्याचं ठामपणे भाजपकडून सांगितलं जात आहे त्यामागचं कारण म्हणजे काल झालेल्या राज्यसभेच्या निवडणुकीत काँग्रेसकडं संख्याबळ असतानाही त्यांचा उमेदवार अभिषेक मनु सिंघवी यांचा पराभव झाला. यामध्ये काँग्रेसच्या ६ आणि अपक्षांच्या ३ आमदारांनी क्रॉस वोटिंग केल्याचं सांगितलं जात आहे. कारण क्रॉस वोटिंगमुळं संख्याबळ असतानाही भाजप उमेदवार आणि काँग्रेस उमेदवाराला समान ३४ मतं मिळाली होती. त्यानंतर लकी ड्रॉ काढण्यात आला यामध्ये सिंघवी यांचा पराभव झाला.

याचाच अर्थ काँग्रेसचं विधानसभेत ४३ इतकं संख्याबळ आहे तर भाजपचं २५ इतकं आहे. पण तरीही काँग्रेसच्या आमदारांनी भाजपच्या बाजूनं मतदान केल्यानं काँग्रेससाठी हा जोरदार धक्का बसला आहे. त्यामुळेच राज्यात काँग्रेस आमदारांमध्ये नाराजी असल्याचं सांगत भाजपनं सरकारवर आमदारांचा विश्वास नसल्याचं म्हटलं आहे.