प्रेम असावं तर असं! कुत्र्याच्या मृत्यूनंतर घोष कुटुंबानं घातलं श्राध्द

हुगळी : कुत्र्यांवर प्रेम करणारे अनेक लोक तुम्ही पाहिले असतील. या वन्य प्राण्यांबद्दलचं प्रेम दाखवण्यासाठी पाळीव प्राणी प्रेमी अनेक मार्ग अवलंबतात. पण, पश्चिम बंगालच्या (West Bengal) हुगळीत राहणारे घोष दस्तीदार कुटुंब (Ghosh Dastidar Family) यापेक्षा वेगळं आहे. दस्तीदार कुटुंब आपल्या पाळीव कुत्र्याला कुटुंबाचा सदस्य मानतात. मात्र, त्यांच्या एका कुत्र्याचा नुकताच मृत्यू झालाय, त्यामुळं या कुटुंबानं त्याचं श्राद्ध घातलंय. आता त्याच्या पहिल्या पुण्यतिथीनिमित्त रस्त्यावर राहणाऱ्या 100 हून अधिक भटक्या कुत्र्यांना त्यांनी मांसाहराचं जेवण घातलं.

तरुण घोष दस्तीदार यांचं कुटुंब हुगळीच्या चंदन नगर भागात राहतं. इथं त्यांचे अनेक पाळीव कुत्रे (Dogs) होते. त्यापैकी एकाचं नाव त्यांनी 'विंचू' असं ठेवलं होतं. घरातील सर्वांचं त्याच्यावर खूप प्रेम होतं. कुटुंबानं त्या कुत्र्याला आपल्या मुलाप्रमाणं वाढवलं. मात्र, गेल्या वर्षी विंचू या कुत्र्याचा मृत्यू झाला. कुटुंबातील सर्व सदस्यांनी मिळून त्याचं श्राद्ध घातलं. या कुटुंबानं दरवर्षी 'विंचू'चा पुण्यतिथी दिन साजरा करण्याचा निर्णय घेतलाय.

या उद्देशानं रविवारी त्यांनी आपलं घर फुलांच्या माळांनी सजवलं. 'विंचू' या कुत्र्याचा फोटो समोर ठेवून पुष्पहार घालून त्याची पूजा केली. त्यानंतर रस्त्यावर राहणाऱ्या भटक्या कुत्र्यांसाठी मांस आणि भाताचा बेत केला. कुटुंबानं व्हॅनमधून जेवण आणून रस्त्यावर फिरणाऱ्या कुत्र्यांना खाऊ घातलं. घोष दस्तीदार हे स्वतः शाकाहारी आहेत, परंतु त्यांनी कुत्र्यांसाठी मांस आणि भात बनवला, कारण त्यांना तो आवडतो. दस्तीदार कुटुंबानं पहिल्यांदाच कुत्र्यांसाठी अन्न तयार करून वाटप केलं असं नाही. यापूर्वी देखील या कुटुंबांना कुत्र्यांसाठी अनेकदा अन्न खाऊ घातलंय. त्यांच्या या कृतीचं सर्वत्र कौतुक होतं.