Kanpur : मुली आंघोळ करतानाचा अश्लील व्हिडिओ बनवला; वसतिगृहातील कर्मचाऱ्यावर गंभीर आरोप

चंदीगडनंतर (Chandigarh) आता कानपूरमध्येही हॉस्टेलमधील कर्मचाऱ्याकडून अश्लील व्हिडिओ बनवल्याची घटना समोर आलीय. चंदीगड प्रकरणाच्या धर्तीवर कानपूरच्या रावतपूर पोलीस स्टेशन (Rawatpur Police Station) परिसरात असलेल्या साई निवास गर्ल्स हॉस्टेलमध्ये (Sai Niwas Girls Hostel) गुरुवारी मुलींनी कर्मचाऱ्यावर अश्लील व्हिडिओ बनवल्याचा आरोप केलाय.

या प्रकरणी सध्या पोलिसांनी आरोपी कर्मचाऱ्याला अटक केली असून त्याच्या मोबाईलची तपासणी केली जात आहे. याच आरोपांच्या आधारे कानपूर आयुक्तालय पोलीस आरोपींविरुद्ध गंभीर कलमांतर्गत गुन्हा दाखल करणार आहे. एसीपी कल्याणपूर दिनेश शुक्ला यांनी ही माहिती प्रसारमाध्यमांना दिली.

या संपूर्ण प्रकरणात वसतिगृहातील विद्यार्थिनींचं म्हणणं आहे की, कर्मचाऱ्याच्या मोबाईलमध्ये विद्यार्थिनींचे अनेक व्हिडिओ आहेत. त्यानं आमचे अश्लील व्हिडिओ बनवले असून त्याच्यावर कडक कारवाई करण्यात यावी, अशी मागणी विद्यार्थिनींनी केलीय. सध्या आरोपीला ताब्यात घेतलं असून त्याच्या मोबाईलचीही चौकशी केली जात आहे. मोबाईल जप्त केल्यानंतर विद्यार्थिनींनी मोबाईलमध्ये अनेक आक्षेपार्ह व्हिडिओ पाहिले आहेत. सध्या विद्यार्थिनींच्या तक्रारीवरून पोलीस वसतिगृहात पोहोचले असता, आरोपीनं मोबाईल देण्यास नकार दिला. त्यानंतर पोलिसांनी आरोपीला बेदम मारहाण केली आणि त्याच्याकडील मोबाईल काढून घेतला आहे.