देशात २४ तासात ३७,३७९ नवे कोरोना रुग्ण, ओमिक्रॉनही १८०० पार

देशात डिसेंबरच्या शेवटच्या आठवड्यापासून कोरोना रुग्णांमध्ये वाढ दिसत आहे. भारतात सोमवारी दिवसभरात ३७ हजार ३७९ नवे रुग्ण आढळले. तर ११ हजार ७ जण कोरोनामुक्त होऊन घरी परतले. दिलासा देणारी बाब म्हणजे मृतांचा आकडा कमी आहे. गेल्या २४ तासात देशात १२४ जणांनी कोरोमनामुळे प्राण गमावले. सध्या दैनंदिन पॉझिटिव्हीटी रेट हा ३.२४ टक्के इतका आहे.

देशातील सक्रीय रुग्णांची संख्या १ लाख ७१ हजार ८३० इतकी झाली आहे. तर आतापर्यंत एकूण ३ कोटी ४३ लाख ६ हजार ४१४ जणांनी कोरोनावर मात केली आहे. देशात कोरोनामुळे आजपर्यंत ४ लाख ८२ हजार १७ जणांचा मृत्यू झाला आहे.

देशात तीन जानेवारीपासून १५ ते १८ वयोगटातील मुलांसाठी लसीकऱण मोहिम सुरु करण्यात आली आहे. या वयोगटाला कोव्हॅक्सिन लशीचे डोस दिले जाणार आहे. आतापर्यंत लसीकरणासाठी ५५ लाखांहून अधिक जणांनी नोंदणी केली आहे. तर काल दिवसभरात ४० लाखाहून अधिक जणांनी पहिला डोस घेतला आहे. तर आतापर्यंत प्रौढांना सुरु असलेल्या लसीकऱण मोहिमेत 146 कोटी 70 लाख 18 हजार 464 डोस देण्यात आले आहेत.