Akhilesh Yadav : आयोग दबावाखाली काम करतोय का? अखिलेश यादव

लखनौ : निवडणूक आयोग दबावाखाली काम करत आहे का, असा प्रश्‍न समाजवादी पक्षाचे सर्वेसर्वा अखिलेश यादव यांनी आज उपस्थित केला. केंद्रीय निवडणूक आयुक्त अरुण गोयल यांनी काल राजीनामा दिला. त्यापार्श्‍वभूमीवर बोलताना अखिलेश यादव म्हणाले, ‘‘लोकसभेची निवडणूक तोंडावर असताना निवडणूक आयुक्तांनी राजीनामा देणे आश्‍चर्यकारक आहे. दबावामुळे अधिकाऱ्यांनी आपली पदे सोडण्याच्या घटना भाजपच्या कार्यकाळात अनेकदा झाल्या आहेत. निवडणूक आयोगावर कोणाचा दबाव आहे, हा प्रश्‍न गोयल यांच्या राजीनाम्यामुळे उपस्थित झाला आहे.’

गोयल यांची मुदत पाच डिसेंबर २०२७पर्यंत होती, तरी त्यांनी शनिवारी (ता. ९) राजीनामा दिला. मोदींच्या हस्ते उत्तर प्रदेशातील विविध विकासकामांचे आज उद्‍घाटन करण्यात आले. त्यावर टीका करताना अखिलेश म्हणाले, ‘‘हा सगळा दिखाऊपणा आहे. निवडणूक जवळ आली असल्याने आपण काम केले आहे, हे भाजपला दाखवावे लागत आहे. त्यामुळे इतरांनी केलेली कामेही ते आपली म्हणून दाखवत आहेत.’’

‘‘आझमगडमधील विमानतळ नेताजींनी (मुलायमसिंह यादव यांनी) बांधले, त्याचे आज उद्‍घाटन करण्यात आले. मोरादाबाद विमानतळही समाजवादी पक्षाने बांधले आहे. त्याचेही आता उद्‍घाटन होत आहे. या सरकारने केलेल्या कोणत्या कामाचे उद्‍घाटन ते करणार आहेत का?,’’ असे प्रश्‍नही अखिलेश यांनी उपस्थित केला. ‘‘हे ‘डबल इंजिन’चे सरकार आहे. पण त्यांनी विमानतळ बांधले नाहीत. जिथे विमानतळ आहेत, तेथे विमाने उतरत नाहीत. रसुलाबाद येथे धावपट्टी बांधण्यात आली. आता धावपट्टीवर सगळीकडे झाडे उगवली आहेत,’’ असे ते म्हणाले.

जनता धडा शिकवेल

‘‘यावेळी शिक्षक आणि बेरोजगार युवक भाजपचे सरकार उलथवून टाकतील,’’ असा दावा करून समाजवादी पक्षाचे अध्यक्ष अखिलेश यादव यांनी केला. काँग्रेसबरोबरील बैठकीबाबत विचारले असता ते म्हणाले, ‘‘आगामी निवडणुकीत भाजपच्या विरुद्धची रणनीती ठरविण्यासाठी ती बैठक झाली. ‘संविधान रक्षक’ एका बाजूला आणि ‘संविधान भक्षक’ दुसऱ्या बाजूला अशी यावेळची निवडणूक असेल. ‘इंडिया’ आघाडीतील तृणमूल काँग्रेसने पश्‍चिम बंगालमधील सर्व जागांवर उमेदवार जाहीर केल्याबद्दल विचारले असता, बोलण्यास अखिलेश यांनी नकार दिला. तसेच उत्तर प्रदेशातील उर्वरित जागांवरील उमेदवार लवकरच जाहीर करण्यात येतील, असे ते म्हणाले.