Jammu Kashmir : 18 तासांत 7 अतिरेक्यांचा खात्मा; काश्मिरात लष्कराची मोठी कारवाई

श्रीनगर : जम्मू-काश्मीरमध्ये (Jammu and Kashmir) दहशतवाद्यांविरोधात कारवाई सुरू आहे. कुपवाडा (Kupwara District) इथं झालेल्या चकमकीत सुरक्षा दलांनी आणखी दोन दहशतवाद्यांचा खात्मा केलाय. इथं आतापर्यंत एकूण चार दहशतवादी मारले गेले आहेत. रविवारी झालेल्या गोळीबारात दोन पाकिस्तानी दहशतवादी (Pakistani Terrorists) ठार झाले आहेत. तर, कुपवाडा व्यतिरिक्त कुलगाम आणि पुलवामा इथंही चकमकी झाल्या आहेत.

प्रसार भारतीनं दिलेल्या माहितीनुसार, गेल्या 18 तासांत 3 चकमकीत 7 दहशतवादी मारले गेले आहेत. कुपवाडामध्ये लष्करचे चार, कुलगाममध्ये जैशचे दोन आणि पुलवामामध्ये लष्कराचा एक दहशतवादी मारला गेलाय. कुपवाडा चकमकीत मारल्या गेलेल्या दोन दहशतवाद्यांमध्ये शौकतच्या नावाचाही समावेश असल्याचं काश्मीर झोन पोलिसांनी (Kashmir Police) ट्विट केलंय. घटनास्थळावरून शस्त्रास्त्र आणि दारूगोळा व्यतिरिक्त आक्षेपार्ह साहित्यही जप्त करण्यात आलंय. सध्या शोध मोहीम अजूनही सुरू आहे. याशिवाय, कुलगाम आणि पुलवामामध्ये रविवारपासून तीन दहशतवादी मारले गेले आहेत.

पोलिस महानिरीक्षक (काश्मीर) विजय कुमार यांनी सांगितलं की, कुपवाडा इथं ठार झालेल्या एका दहशतवाद्याची ओळख पाकिस्तानी नागरिक म्हणून झाली असून, त्याचे लष्कर-ए-तौयबाशी संबंध होते. दुसरा दहशतवादीही लष्करचा असल्याचं सांगण्यात येतंय. पोलिसांनी दिलेल्या माहितीनुसार, अटक करण्यात आलेल्या दहशतवादी शौकत अहमद शेखकडून मिळालेल्या माहितीच्या आधारे सुरक्षा दलांनी कुपवाडाच्या लोलाब भागात ऑपरेशन सुरू केलंय. त्याचवेळी नंतर चकमक सुरू झाली. काश्मीर झोन पोलिसांनी ट्विट केलंय की, शोध सुरू असताना लपलेल्या दहशतवाद्यांनी सुरक्षा जवानांवर गोळीबार केला. त्यानंतर सुरक्षा दलांनीही प्रत्युत्तर देत दहशतवाद्यांचा खात्मा केलाय. तर, दुसरी चकमक दक्षिण काश्मीरातील कुलगाममधील दामहाल हांजी पुरा भागात झाली, तिथं दोन दहशतवादी मारले गेले आहेत.

------------------------------------------------