Jyotiraditya Scindia : सिंधियांनी ट्विटर बायोवरून 'BJP' ला हटवलं? घरवापसीच्या टोमण्याला दिलं तिखट उत्तर

भाजप नेता आणि केंद्रीय मंत्री ज्योतिरादित्य सिंधिया हे काँग्रेसच्या वाटेवर असल्याच्या चर्चेने जोर धरला आहे. एका काँग्रेस नेत्यानं सिंधिया यांनी आपल्या ट्विटरवरुन भाजपचं नावं हटवलं असा दावा केला आहे. पण घरवापसीच्या टोमण्याला सिंधीया यांनी तिखट उत्तर दिलं आहे.

काँग्रेस नेत्याच्या दाव्यावर सिंधिया यांनी ट्विट करत स्पष्टीकरण दिलं आहे. "काँग्रेस पक्षाकडे कोणताही मुद्दा नाही. म्हणूनच सकाळ संध्याकाळ फक्त खोटेपणा आणि प्रचार करावा लागतो. माझ्या ट्विटर बायोपेक्षा तुम्ही जनतेचे मन चांगले वाचले असते तर 15 महिन्यांत भ्रष्ट सरकार गेले नसते.

अशा आशयाचे ट्विट करत खोचक टोमणे मारले आहेत. सिंधिया यांच्या ट्विटनंतर काँग्रेस नेते पवन खेडा रिट्विट करत सिंधिया यांना छेडले आहे.

"ये दुनिया मेरे बाबुल का घर, वो दुनिया ससुराल, जा के बाबुल से नजरें मिलाऊं कैसे, घर जाऊं कैसे? लागा चुनरी में दाग…अशी हिंदी गाण्याची कडवं शेअर करत काँग्रेस नेता खेडा यांनी सिंधिया यांना डिवचण्याचा प्रयत्न केला आहे.

तर दुसरीकडे, काँग्रेसचे ज्येष्ठ नेते दिग्विजय सिंह यांचे धाकटे बंधू आमदार लक्ष्मण सिंह यांनी पक्षात ज्योतिरादित्य सिंधिया यांची उणीव जाणवत असल्याचे म्हटले आहे. त्यामुळे मध्य प्रदेशमधील राजकीय गोटात चांगलाच गोंधळ निर्माण झाला आहे.

2020 मध्ये काँग्रेसविरोधात बंड करून भाजपमध्ये सामील झालेले सिंधिया सध्या केंद्रीय मंत्री आहेत. सिंधिया यांनी काँग्रेस सोडताच मध्य प्रदेशातील काँग्रेस सरकार अल्पमतात आले आणि नंतर शिवराज सिंह यांच्या नेतृत्वाखाली भाजपचे सरकार स्थापन झाले.