Karnataka Election : गैरसमजुतीतून ग्रामस्थांनी केली मतदान यंत्रांची तोडफोड; अधिकाऱ्यांनाही धक्काबुक्की

बेळगाव : राज्याच्या अनेक भागात मतदानाला (Karnataka Assembly Election) कमी-अधिक प्रमाणात प्रतिसाद मिळाल्याचे वृत्त हाती आले असताना बसवाण बागेवाडी तालुक्यात (Basavan Bagewadi) मतदान प्रक्रियेला गालबोट लागल्याचा प्रकार घडला आहे.

मसबिनाळ येथे दाखल झालेली जादा मतदानयंत्रे (Voting) विजापूरकडे नेण्यात येत होती. या दरम्यान, मतदान प्रक्रिया अर्ध्यावरच संपवून यंत्रे परत नेत असल्याच्या गैरसमजुतीतून ग्रामस्थांनी मतदानयंत्रे फोडल्याची घटना घडली.

याबाबत मिळालेली अधिक माहिती अशी की, मसबिनाळ (ता. बसवाण बागेवाडी, जि. विजापूर) येथे दाखल झालेली जादा मतदानयंत्रे मनबिसनाळ येथून विजापूरला नेण्यात येत होती; पण, मतदान प्रक्रिया अर्ध्यावर सोडून मतदानयंत्रे नेण्यात येत असल्याच्या गैरसमजुतीतून ग्रामस्थांनी गोंधळ माजविला. या गोंधळात मतदानयंत्रे फोडून अधिकाऱ्यांच्या वाहनाचेही नुकसान करण्यात आले.

तसेच, मतदान प्रक्रियेसाठी नेमलेल्या अधिकाऱ्यांनाही धक्काबुक्की केल्याचा प्रकार घडला. मसबिनाळ येथे दाखल झालेली जादा मतदानयंत्रे विजापूरकडे नेत असताना ग्रामस्थांनी अधिकाऱ्यांकडे चौकशी केली. पण अधिकाऱ्यांकडून समाधानकारक माहिती न मिळाल्याने संतापलेल्या ग्रामस्थांनी मतदानयंत्रे फोडून टाकल्याचे सांगण्यात येत आहे. याप्रकरणी पोलिसांनी घटनास्थळी दाखल होऊन पंचनामा केला.